1828/2022-2023
Champhai, the 5th September, 2022: Vawiin chawhnu dar 2 khan Champhai District Education Committee buatsaihin Zirtirtu thawk tha chawimawina dawngtu, State Awardee Pu F.Lalramliana, Headmaster, Govt. Zawlsei Middle School lawmpuina hun an Chairman, Pu James Lalrinchhana, District Bawrhsap hovin DC Conference Hall-ah hman a ni.

Pu James Lalrinchhana chuan Zirtirtu tha thlang tura tehfung hrang hrangte sawizauin, tehfung hrang hrangte zulzuia endikna paltlangtu Govt. Zawlsei Middle School Headmaster Pu F.Lalramliana, Champhai District-in a nei chu lawmawm tiin, chhuanawm a tih thu a sawi a. State huap inelna sang tak hnuaia chawimawina dawngtu kan nei hian District chhung Zirtirtute-ah chona nasa zawk bakah, zirna tihhmasawn leh chawisan kawngah tanlakna thar siam se a duh thu a sawi a. Thil dang ngaihthah chuang lovin zirna, hriselna leh infiamnate chu District-ah a lailum chantira ngaihpawimawh hmasaka neih tum a nih thu a sawi bawk.

DEC Chairman chuan hrileng vanga hun engemawchen a khaihlak hnuah boruak muanawm tak hnuaia 'Zirtirtute Ni' hman a ni thei chu lawmawm tiin, Zirtirtute chu zirtir hna mai bakah khawtlang leh ram siamthat kawnga thahnemngai taka thawk thintute an ni a, hrileng hun lai pawhin theihtawp chhuahin tanpui ngaite tanpuiin an lo luangchhuak fo tawh thin a ni, a ti a. DEC a tawn hriat ngah tak tak State Awardee mai piah lamah National Awardee-te thlenga an awm chu thlamuanthlak a tih thu sawiin, DEC chu rualawhna dik nena kalpui a ngai a, inhmakhua lawkna kalpuia District tihmingtha thei turte thlithlaia chherchhuah kawngah tanlak a tul a ni, a ti bawk.

State Awardee Pu F.Lalramliana, Headmaster, Govt. Zawlsei Middle School pawhin thu sawiin, State Awardee ni thei tura kalkawngte a sawi a. Pathian kaihhruainaah lawmthu sawiin, District Education Committee, Selection Committee leh thahnemngai taka amah thlawpa tawiawm thintute chungah lawmthu a sawi bawk.

He hun hi DEC Member Secretary Pu T.T Laltanpuia, DEO & DPC, Samagra Shiksha, Champhai District chuan a kaihruai a. DEC Chairman-in Pu F.Lalramliana hnenah lawmpuina thuziak cheimawi leh pawisafai a hlan a. Kalkhawmte atangin thusawi ngaihthlak a ni bawk.

Hetih rual hian vawiin khan Zirtirtute Ni chu Champhai District chhunga zirna in hrang hrangahte ropui taka lawm a ni a. District Education Committee thurel angin Teachers' Day hi zirnain hrang hrang ten School Management Committee/ School Management & Development Committee-te ruahmanna leh remchan dan angtein an lawm a. DEC Chairman-in Teachers' Day puala thuchah a siam chu tihchhuah a ni a. Khawlai hulum laiah Zirtirtute chawimawina banner tarchhuah a ni bawk.