1827/2022-2023
Dated Serchhip the 5th September, 2022: Vawiin Teachers' Day, 2022 denchhen hian Serchhip District a zirtirtu tha thlan chhuah mi pathumte hnenah District Award to Teacher hlan a ni a, Serchhip bawrhsap Pi Nazuk Kumar, IAS chuan khuallian niin a telpui.

A dawng tura thlante hnenah Pi Nazuk Kumar hian chawimawina a hlan hnuin thusawina a nei a. Khawtlang nun a tha zawnga thlak danglamna atana hmanraw pawimawh ber chu zirna hi a ni a. Sawrkar thlirna atang pawhin zirna hi hmalakna pawimawh ber a ni lo thei thin lo. Serchhip district pawh kan rama Literacy rate sang ber kan ni a, a chhuanawm hle a. He dinhmuna kan din theih chhan chu kan zirtirtute thawhrimna vang a ni tih achiang hle a, ka chhuang em em che u a ni, a ti. Chawimawina dawngtu zirtirtute a lawmpui thu sawiin, nakkumah hei aia tam zawk chawimawina dawng tlak awm thei se a duh thu a tarlang a ni. Naupangte hnenah zirna tha (quality education) pek tuma thahnemngai sauh sauh turin district chhunga zirtirtute a ngenin, intihsiakna (competition level) a sang zela, chumia dam khawchhuak zo tura kan naupangte kan zirtir sauh sauh a ngai a ni, tiin a chah a ni.

Chawimawina hlanna inkhawm District Education Office a buatsaihah hian Pu Vanlalchhana, SDEO chuan District Award an buatsaih dan leh chawimawina dawngtu tur an thlan dan a sawi a. Mizoram sawrkarin kum 2018 ah khan District Award hi buatsaih thin tawh tur a nih thu thuchhuah a siam a. Amaherawh chu hripui vangin a taka kalpui mai a nih loh hnuah kuminah an buatsaih tan ta tih a tarlang a. A dawngtu tur thlan thuah Village Level Committee te, Sub- Division Level Committee leh District Level Committee awmin uluk takin tehna hrang hrang hmanga teh an ni, a ti.

Vawiina chawimawina hlan zirtirtute chu; Pi Lalramngaii Sailo, Headmistress, Govt. Hmar Veng Primary School te, Pu R. Vanlalhluna, Headmaster, Govt. Middle School II, Chhingchhip te leh Pu Paul Zohmingthanga, Headmaster, Govt. JM High School, Serchhip te an ni a. Lawmman hi Citation, Medal leh pawisa fai Rs. 5000 theuh hlan an ni. An hnathawh dan chanchin ngaihnawm tak te chu Pi K. Zoramchhani, Headmistress, Govt. PCR H/S chuan chhiarchhuahna a nei a ni.