Vawiin chawhma dar 10 khan Draft Photo Electoral Roll 2016 chu mipuite en theih turin Champhai District Election Officer leh Deputy Commissioner ni bawk Pu Vanlalngaihsaka IAS chuan a tlangzarh.
DC Pu Vanlalngaihsaka chuan thu sawiin thawktute thawhrim zara a hun taka Draft Electoral Roll, 2016 tlangzarh a ni theih chu lawmawm a ti a, Political party te chu an ta a nih anga Draft tlangzarh chu ngaipawimawh turin a chah a. Nakum January ni 5, 2017-a final publication of Electoral Roll pawh a hun ah felfai taka tlangzarh anih theih nan thawktu te leh Political party te tanrual a pawimawh thu a sawilang bawk a ni. Pu C.Lalzarliana, Addl. DC/ERO pawhin thu sawiin ramdang Bangladesh leh Myanmar atang te in dan lo a lo lut thin tam tak Roll a thunluh a awm thin a, Electoral Roll thianghlim, dik leh felfai tak kan neih theih nan political party te hemi kawngah hian thanharh a tul thu sawiin, kim tlinglo Roll a thun thin te, ram dangmi thun tumna la awm fo thin chu a ngaimawh thu a sawi bawk.. Pu Lalhmuakliana, Election Officer chuan Draft Roll tarchhuah tak dinhmun tlangpui a tarlang bawk.
Draft Roll a tarlan dan in Champhai District chhunga A/C bial 5 ah hian Voters 80863 an awm a, heng zinga 40226 chu mipa an nih laiin 40637 chu hmeichhia an ni a, an inthlauhna chu 411 a ni a. 21 Lengteng ah 16467 awmin, 22 Tuichang ah Voters 15611, 23 Champhai North ah 17727, 24 Champhai South ah Voters 16607 leh 25 East Tuipui ah 14449 an awm a ni.
Champhai DC Conference Hall a tlangzarh hunah hian ERO, AERO, Election Offcer leh Political party hrang hrang hruaitute an tel a ni. Election Commission of India in Special Summary Revision 2017 buatsaih tura a tih angin 1.1.2017 a kum 18 tling chin zawng zawng te Roll a thun thar tur a nih bakah belh emaw paih emaw siamthat ngai te chu 15.9.2016 atanga 14.10.2016 chhungin mahni bial tu BLO te hnenah dilna form la in thehluh theih anih thu he tlangzarh hunah hian sawilan a ni.
Special Summary Revision of Electoral Roll 2017 neih tur atan hian chhun dar 12 atang khan I&PR Conference Hall ah 23-Champhai North leh 24-Champhai South BLO te tan training buatsaih a ni a. Training hi Pu K Lalhmuakliana, EO in a kaihruai a, Champhai District Level Master Trainer, (DMLT) Pu Remlalliana Hnamte MCS leh Pu Beitlotha Nohro, MCS ten training hi an pe a ni.
