Vawiin chawhma khan Sub-Headquarters YMA Conference Hall, Lungleiah District Urban Development Office bultumin One Day Workshop on Pradhan Mantri Awas Yojana/ Housing for All (Urban) neih a ni a. UD&PA Director Pu Zorammuana, MCS in kaihruaiin, UD&PA Minister Pu Zodintluanga chu Khuallian a ni.

Pu Zodintluanga chuan mi harsa zawk mahni chenna in neilo ten in an neih theih nan Housing for All kaltlangin a mamawh apiangte hnena insak tanpuina pek an tum thu a sawi a. A diltuten a sakna tur inhmun an neih hmasak a, a criteria mil a dilna dik an thehluh chuan a diltute insak tanpuina pek vek an tum thu a sawi. Loan la duh te tana theihtawpa bank nawr an tum thu sawiin, a satu te sak ang zela in sak tanpuina pek an nih tur thu a sawi bawk.

Minister chuan hmasawnna ruhrel tam tak rawn keng tur, Municipal Board chu Lungleiah din an duh tawh thu a sawi a, mahse mi thenkhat tan eizawnna kawngah harsatna a thlen dawn avangin mipui ngaihdan ngaihtuah hmasak tha an tih thu a sawi. Kal khawm te chu workshop hlawk taka chhawr tur leh Department-in hma a lakna hrang hranga thlawp zel turin a sawm a ni.

Pu Zorammuana pawhin sawrkar laipui phut angin Lunglei khawpuiah urban local body din a la nih loh avang leh mipui cheng zat in a la tlin loh avangin, Lunglei chu AMRUT hnuaia rin luh a la remlo a ti a. Lunglei in faina kawnga hma a sawn zel chu lawmawm a tih rualin, khawtlang hruaituten kawngpui dim tura mipui hrilhhre tura hma an lak tha a tih thu a sawi.

Workshop hi session hnih a then niin, session khatna hi UD&PA Director Pu Zorammuana’n kaihruaiin, IEC Specialist Pu Michael Lalneihtluanga’n Beneficiary Led Construction (BLC) chungchang zirtirna a nei a. Session hnihna hi Lunglei DUDO Pu Andrew Lalhruaia’n kaihruaiin, MIS Specialist Pu Lalfakzuala’n Credit Link Subsidy Scheme (CLSS) chungchang zirtirna a nei ve thung a. Heng in zirtirna bakah hian sawihona hun tha tak hman a ni.