Vawiin chawhma khan Champhai District Election Officer (DEO) Dr.Naveen Aggarwal chuan a Pisaah kan hma lawka Lok Sabha inthlan lo awm tur chungchanga hmalaknate chanchinbumite a hrilhfiah. DEO hi Pu Alan Lalthanzara, Election Officer leh Dr Lallawmkima, DIPRO ten an tawiawm a, Media lam hi Pu C.Lalhnunpuia, Champhai District MJA President chuan hovin memberte an kal tha hle a ni.

Dr Naveen Aggarwal chuan Champhai District-ah vote tla a that theihna tura Media mite tawiawmna ngenin hemi kawnga zau zawka mipuite zirtir chhawng zel turin a sawm a, ‘Vote thlak chu khua leh tuite dikna anih bakah   mawhphurhna leh tihtur a ni, a ti a. DEO chuan ECI in rualbanlote leh kum 80 chuang vote neiten vote an thlak ve ngei theihna turin tan a lak thu leh Champhai District-ah pawh vote an thlak theihna turin Maxi Cab Association nena inberemin an kal leh hawna ngaihtuahsak tum anih thu a sawi a, BLO te hnenah inhriattirin zing dar 10 atanga chawhnu dar 1 thlenga an tan a hun siam anih tur thu leh intlar ngai lova BLO, MPF leh inthlan duty Official-te puihnaa vote thlak tir zel an nih tur thu a sawi  a.   Vote nei thar zawng zawngte pawhin an dikna leh chanvo neih thar an hlen ngei theihna tura vote thlak vek turin a sawm a. District chhunga Vote tlak thatna ber Polling Station awmna veng / khua te hnenah  khawtlang mamawh hmasawnna ruhrel awm angahte line department nena inberawn chunga lawmman siamsak tum anih thu a sawi bawk.

Pu Alan Lalthanzara, Election Officer Champhai chuan Lok Sabha inthlan inpuahchahna hrang hrangte tarlangin inthlanna felfai leh entawntlak  neih anih theihna tura Media-te tawiawmna leh mipuite vote thlak theuh tura zirtir kawnga tanlak puiah a sawm a. District chhungah boruak muanawm taka awm thu leh Critical Polling Station a awm loh thu sawiin, vote thlak ni April ni 11-a duty tur ten a hma ni April ni 10 a an duty-na tur hmun an pan dawn a, hemi hma deuhin an duty-na tur Polling Station hrilhhriat an ni dawn chauh a ni, a ti a. Lok Sabha inthlan atan EVM khawl Control Unit 209, Ballot Unit 211 leh VVPAT 202 te puahchah fel diam anih bakah khawl chhiat palh pawha hman mai theih tur pawh inrinlawka dahthat anih thu a sawi a.  District chhunga Assembly Constituency 5 ah te Hmeichhe hlang duty-na tur Dingdi Polling Station ti a vuah 14 a awm dawn thu  sawiin, heng bakah hian Polling Station thlan bik 10 ah te vote thlaklai thlithlai tura thlalakna vuah tum  a ni, a ti a.  Champha District inthlan rawn enfiah turin General Observer Pu Bidol Tayeng IAS, Expenditure Observer Pu Lallien Songate IRS leh Police Observer Pu Sachin Ashok Patil, IPS ten Champhai an rawn tlawh tawh thu a sawi a. Election Officer chuan inthlan vote thlak ni a darkar hnih dan zela vote tla report pekna tur Pollstar chungchangte, inthlan vuakveta Political party leh Candidate-te sum hman dan viltu Election Expenditure Monitoring Committee peng hrang hrang leh an hmalak dan tlangpuite a sawifiah bakah EVM dahna Strong room leh Vote chhiar huna ruahmnanna an neihte  a sawifiah bawk a ni.

He hunah hian Champhai District MJA President Pu C.Lalhnunpuia pawhin thu sawiin District Election Offcer-in thu leh hla puangtute tana Press Meet a ko chu lawmawm a tih thu a sawi a. Pianphunga rualbanloten vote an thlak theihna tura District Election Office hmalakna chu fakawm a tih thu a sawi a.   Service voter-te vote thlak pung theihna tura hmalak angaih thu leh Champhai District-ah Vote thlak percentage a that theihna tura tanlak angaih takzet thu sawiin, hemi tihhlawhtling kawngah Media-te theihna zawnah  tawiawm an tum thu a sawi bawk.
 
Tun MP (Lok Sabha) inthlan turah hian Champhai District-ah General Voter 86426 awmin heng zinga 43685 hi hmeichhia niin 42741 chu Mipa an ni a, Mipa Vote aia Hmeichhe Vote tam zawkna hi 944 a ni. Service Voter 715 awm zinga 713 te hi Mipa niin 4 dangte chu hmeichhia an ni. Champhai District chhunga Polling Station awm zawng zawng 137 atanga 41 chu khawpui huamchhunga mi niin, a bak Polling Station 96 te chu khawpui pawn a awm a ni. Vote 100 aia tlem awmna Polling Station 1 chauh a awm laiin Vote 1000 chuang awmna Polling Station 13 a awm a ni. Inbiakpawh harsatna Mobile Shadow Area Polling Station 15 chhinchhiah a ni a, heng hmunahte hian MPRO te puihna hmanga inbiakpawhna ruahman tum a ni a. District Election Office atanga Polling Station hla ber chu Km 191-a hla Mimbung Polling Station niin District chhunga Polling Station 137 zinga 123 te chu Lirthei hmanga darkar 6 chhunga thlen hman a ni.