1644/2023-2024

Champhai the 25^th August, 2023 – Assembly Constituency pathum awmna Champhai District chhunga Special Summary Revision of Electoral Roll, 2023 kalpui mek endik tura Election Commission of India (ECI) in a ruat Electoral Roll Observer Pi Lalzarmawii, IAS, hovin vawiin khan Champhai DC Conference Hall, Keifangtlang-ah meeting neih a ni.

He hun hi Champhai DC & DEO Pu James Lalrinchhana’n kaihruaiin ERO, AERO leh official dangte bakah Political party hrang hrang aiawh, leh tlawmngai pawl aiawhte an tel a. Election Officer, Champhai Pu Benjamin Zalawma Ralte hnen atangin roll revision kalpui mek chungchang report ngaihthlak a ni.

Electoral Roll Observer Pi Lalzarmawii chuan Special Summary Revision of Electoral Roll 2023 neih mek chu dik leh felfai taka kalpui anih theihna tura hmalakna enfiah tura ruat anih thu sawiin, zawhna nei leh rawtna thlen duh neite tan a inhawn reng thu a sawi a. Election kaihhnawih hmalakna hrang hrang a bik takin electoral roll dik leh felfai kan neih theihna tura hmalakna ah te official-te, NGO-te, kohhran te leh khawtlang hruaitute thahnemngaihna a fakawm takzet a ni tiin kan tanrualna zarah Mizoramin electoral roll felfai tak kan nei thei a ni, a ti a. Democracy hrisel tak kan neih zel theihnan khua leh tui vote nei thei chin te chu electoral roll a kan inziahluh veka, a hun a thlena vote kan thlak theuh a pawimawh a ni tiin, Electoral Roll-ah kan hming a chuang ngei em tih lo finfiah ve theuh turin Champhai District mipuite chahin Voter Helpline Application pawh lo hmang tangkai ve theuh turin a sawm a ni. Political party-te pawh District chhunga polling station tinah Booth Level Agent (BLA) ruat ngei turin a chah bawk a ni.

Champhai District Draft Electoral Roll, 2023 chu August ni 2, 2023 khan tlangzarh niin he Roll-ah hian Champhai District ah voter 56,438 (mipa 27,560 leh hmeichhia 28,878) an awm a, Roll hmasa dated 13/01/2023 atangin voter 76 in a pun belh a ni.

August ni 2, 2023 a tlangzarh tak, Champhai District Draft Roll dinhmun tlangpui chu a hnuaia tarlan ang hi a ni:

Tun dinhmunah roll a luh dilna leh tih danglam dilna (Filing of claims and objections) chu hawn mek niin, August ni 31, 2023 (Thursday) thleng hawn a ni a. India khua leh tui dik tak, October ni 1, 2023 a kum 18 tling hman te tan electoral roll a luh dilna hi a thehluh theih a ni a.

Mizoram Assembly Election, 2023 a hman tur Electoral Roll Final Publication chu October ni 4, 2023 ah neih a ni ang.

Meeting neih hnua hian Electoral Roll Observer Pi Lalzarmawii, IAS, hian Election Branch, DC Office a tlawh a, electoral roll revision hna kalpui mek lai leh General Election to Mizoram Legislative Assembly hmachhawn tura inpuahchahna kal mekte enfiahin, thawktute nen inkawmhona hun an hmang a ni.

Electoral Roll Observer ho hian Champhai khaw chhunga Polling Station pahnih – Vengsang-I Polling Station (Govt GM High School) leh Kahrawt I Polling Station (Govt P/S I) inspection neih a ni bawk.