1645/2023-2024

Hnahthial the 25th August 2023: Vawiin chawhma khan DC Conference Hall, Hnahthialah District Level Committee on Pradhan Mantri Aadi Adarsh Gram Yojana (PMAAGY) chuan thutkhawmna neiin Hnahthial district chhunga hmalakna kalpui dan tur an rel a. Deputy Commissioner Pu Chuauhnuna chuan hun kaihruaiin kum 2023-24 chhunga Hnahthial District-a khaw thlanchhuahte tihchangtlun dan tur leh hmalak dan tur te an thlir ho.

Deputy Commissioner Pu Chuauhnuna chuan Ministry of Tribal Affairs hnuaia Pradhan Mantri Aadi Adarsh Gram Yojana (PMAAGY) tum ber chu Tribal population tamna khua te tihchangtluna model village a siam a ni tih tarlangin; khawtlang tih hmasawnna hna chu uluk tak a ruahman a pawimawh thu a sawi a. PMAAGY chu khawtlang tana tangkai leh ro tling siam chhuah nana hman ngei a pawimawh a ni a ti bawk. Village Development Plan chu uluk leh felfai taka siam a tul tiin hna chu a taka kalpui a nih hunah pawh hnathawktute uluk tak a vilpui a pawimawh a ti a, khaw thlanchhuahte model villages a siam thei turin VDP in hmalak dan tur a duante chu tha tak a ti hlawhtling turin member kalkhawmte a chah bawk a ni.

Kum 2023-2024 chhungin PMAAGY hnuaiah Hnahthial district atan khaw 9 thlanchhuah niin Bualpui-V, S Chawngtui, Rawpui, Rotlang E , Muallianpui, Bualpui H, Leite, Darzo leh Tuipui D te thlan an ni a , khaw thlanchhuah tinah cheng nuai 20.38 theuh ruahman niin chumi hmang chuan khawtlang mamawh hrang hrang ngaituah ho niin ruahmanna siam a ni a, proposal-te ngùn taka ngaihtuah a sawi ho hnuin lungrual taka pawm tlan a ni.

Vawiin thutkhawmna ah hian Project Director, DRDO, Member Secretary CDPO, SDO PWD , DHO, BAO , Executive Engineer, PHED bakah chanchinbumite an tel a ni.