1906/2022-2023

Champhai, the 13th September, 2022: Vawiin tlai dar 5 khan Champhai District Electricity Committee (DEC) chu an Chairman Pu C.Lalrosanga, MP, Lok Sabha hovin DC Conference Hall-ah an thukhawm. He hun hi DEC Member dang Pu T.J. Lalnuntluanga, MLA, 24-Champhai South AC;  Dr. ZR Thiamsanga, MLA, 23-Champhai North AC leh Pu Ramthanmawia, MLA, 25-East Tuipui AC te chuan an telpui bawk.

Power Project Division, Champhai hnuai Champhai Power Sub Division leh Champhai Rural Power Sub Division kaltlanga khua/veng 60 a power dawn dan leh semchhuah dante thlirho niin, hmalak tulte sawiho a ni a. Tun dinhmuna 132 kV level-a power supply dawn thleng hman mek 12.5 MVA, 132/33 kV Power Transformer chuan 10.5 MW aia tam a pek chhuak thei loh avang leh thlasik laia power hman san huna power khaihlak lohna tura hmalak tawh dante ngaihthlak a ni a. 12.5 MVA 132/33 kV Power Transformer pakhat dang chu Champhaia bunfel thuai tuma hmalakna chak taka kalpui mek a nih thu leh hnathawhna tur tul zualpui atana hman tur sum dawn fel a nih tawh thu he hunah hian tarlan a ni a. P&E Department tarlan danin 2021 leh 2022 thlasik laia Champhaia power hman san ber chu 10.7 MW a ni tawh a, kum 2022 leh 2023 thlasik huna power hman san ber tura rin chu 12.8 MW thleng ni tura chhut lawk a ni.

Tun dinhmunah hian 33/11 kV Power Transformer Champhai khawpui chhungah 6.3 MVA pahnih, 2.5 MVA pahnih leh 1.6 MVA pakhat, avaia belhkhawm 19.2 MVA bakah, thingtlang lamah 2.5 MVA pahnih, 1.0 MVA pakhat leh 1.6 MVA pakhat, avaia belhkhawm 7.6 MVA te a awm mek a. Power sem chhuahna atan hian 33 kV level-ah 26.8 MVA a awm mek a, hemi tlukpui pechhuak tur hian 12.5 MVA dang dah belh a tul ta a ni. Tun dinhmunah hian 132 kV Sub-Station 1, 33 kV Sub-Sation 5 bakah khaw tina power lakluh nan 11 kV Sub-Station bun niin, Distribution Transformer 178 a awm mek a. Champhai Power Project Division hnuaiah hian consumer 19,367 an awm mek a, nitin consumer thar 60-70 vel an awm belh zel anga chhut a ni.

He hunah hian mipui him zawk nana Transformer sawn tura dilna lut bawhzui dan turte leh senso ngaite sawiho a ni a. Champhai khawpui chhung bikah power supply mamawhna a than chak em avangin Distribution Transformer tih len leh a thar dah belh a tul tak zet thu tarlan niin, hmalak dan turte sawiho a ni bawk.

DEC thutkhawmah hian Member Secretary Pu James Lalrinchhana, DC Champhai; Convener Pu Lalchhanhima, SE, Champhai Power Circle; Pu Lalrinpuia Varte, SP Champhaite an tel a ni.

Meeting zawh hnu hian Lok Sabha MP Pu C.Lalrosanga chuan MJA Press Club, Champhai chu tlawhin MJA member-te nen inkawmhona hun an hmang a, tul leh mamawhte an lo thlen a ni.