1907/2022-2023
Aizawl, the 14thSeptember 2022 : Sawrkar Laipui a Minister of State for Consumer Affairs, Food & Public Distribution and Rural Development Pi Sadhvi Niranjan Jyoti chuan nimin tlai dar 6:00 pm khan Hotel Floria ah Rural Development, Food, Civil Supplies & Consumer Affairs Department leh PWD te chu a Ministry enkawl kaltlanga heng Department 3 te hnuaia scheme leh project hrang hrang thawh mek te dinhmun thlirin review meeting a neihpui a ni.

Pi Sadhvi Niranjan Jyoti chuan Central Sawrkar chu ruahmanna hrang hrang siamtu nihmahsela a taka hna thawktute chu State Sawrkar hrang hrangte an ni tiin Central Sawrkar chuan State Sawrkar te chu ang khatin a en vek thin thu a sawi. Sawrkar chu mitin ta, mitin tan anih thusawiin Prime Minister chuan ramchhung state zawng zawngten rualkhai taka hma an sawn nan theihtawp a chhuah mek a ti a. Hmarchhak state te leh an hmasawnna chu Prime Minister in a ngaihpawimawh em avangin Central Minister te chu Hmarchhak state te tlawh reng turin a hrilh thin tiin a sawi bawk.

Rural Development Minister Pu Lalruatkima pawhin meeting ah hian thusawiin Central Sawrkarin in hripui len laia kawng hrang hranga Mizoram Sawrkar a puihnaah lawmthu a sawi a. Thintlang lamin hma an sawn ve loh chuan khawpui ringawt hmasawnna in rualkhai takin hmasawnna a thlen lo thu sawiin Mizoram Sawrkar chuan kawng hrang hranga thingtlang hmasawnna chu a ngaipawhmawh berte zing a mi a ni, a ti.

Meeting ah hian Rural Development Department in MGNREGS, PMAY leh MzSRLM hnuaia hma an lak mekte leh PWD in PMGSY hnuaia hma an lak mekte te presentation hmangin an tarlang a. Heng presentation ah hian Minister in zawhna hrang hrang a neihte chu Department officials te an chang a ni. FCI hotute meeting a rawn tel te chuan Central Minister chu FCI in Mizoram a buhfai a pek dan leh an dinhmun tlangpui a sawi a. Pi Sadhvi Niranjan hian Supply hotute chu One Nation One Ration Card dinhmun tlangpui a zawt bawk a ni.

Meeting ah hian Pu Zarzosanga, Secretary Rural Development Department leh a thawhpuite, Pi Ramdinliani, Secretary, Food, Civil Supplies & Consumer Affairs Department leh a thawhpuite an tel an ni.