No.5883/2020-2021

Dated Champhai, the 8th October, 2020: National Green Tribunal-in District tina Environment Plan mumal tak siam tura thurawn a siam bawhzuiin vawiin khan Champhai District Level Committee on Environment Plan chu Bawrhsap Pi Maria C.T Zuali hovin DC Conference Hall-ah an thukhawm a, Champhai District Environment Plan mumal tak siama hman anih theihna tur kawngah inrawnkhawmna neih a ni.

Bawrhsap Pi Maria C.T Zuali chuan bawlhhlawh siam thei hrang hrangte laka Champhai district a lo fihlim zawka, hriselna kawnga hma kan sawn theihna turin District Environment Plan mumal tak neih a tul thu a sawi a. District Environment Plan duan chhin anih thu sawiin, hrual mum anih theihna turin belh leh paih ngaite ngun taka zirchianga infinchhuah kawnga theihtawp chhuahpui turin member-te a sawm a ni.

Thukhawm chuan Central Pollution Control Board dungzuia siam Champhai District tana Environment Plan duan chhin chu thlir hovin belh emaw, paih ngai awmte zirchian anih hnuah siamrem a ni a. Mipuite hnenah peihfel anih hunah zau zawka zirtir hna kalpui nise tih a ni bawk. Hnawmhnawk leh boruak tibawlhhlawh thei hrang hrangte chhuichiana, chinfel leh enkawl zui dan turte sawiho a ni a. Hnawm sakhat, Plastic, insakna leh thiahna chak hrang hrangte, Damdawiin, Clinics leh Laboratory hnawmte, mihring tana hlauhawm bik hnawmte, electronics bungraw hlui leh chhiate thliar hranga hnawksak lova chinfel dan turte sawiho a ni a. Tui thianghlim vawnhimna tura tulte, In atanga tuichhe luangchhuak mumal taka sawngbawla hman tangkai anih dan turte thlenga ruahmanna siam a ni a. Heng bakah hian boruak thianghlim vawnhimte, lung leh balu lakna chungchang leh ri bengchheng siam thei hrang hrang ven dan tur chungchangte pawh chipchiar taka sawiho a ni a, hmalakna tur leh hmala turte ruat nghal an ni bawk.