No.5884/2020-2021

Aizawl, the 8th 2020 : Vawiin khan Home Minister Pu Lalchamliana’n GS Arya Mess, Mizoram Police Headquarters ah Constable 161 te Honorary Head Constable-a kaisang te hnenah bel pekna Piping Ceremony a hmanpui.

Home Minister chuan Constable te chu Police hna hlenchhuah kawnga kut ke ber pakhat an ni tiin an tel lovin officer te tan hna thawh hlei theih a ni lo, a ti a. Constable te tan kaisanna remchang a tam lo tih hriain Police hotuten Constable te kaisanna tur ruahmanna a siam a, Sawrkarah bawhzuiin hei hi Sawrkar pawhin awm a ti a, Cabinet ah pharhin Cabinet chuan an remti ta a ni, a ti. Head Constable a kaisang Constable 161 leh an chhungte chu a lawmpui thu sawiin Home Minister chuan hei hi kum 20 chuang rinawm leh tha taka hna an thawh rah a ni, a ti a. Kaisannain mawhphurna tam zawk a ken tel bakah zahawmna a pek belh thu sawiin an hnathawh kawngah Police te chu hawihhawm tak chunga mipui te thlamuanpui theih, rinna an nghah ngamna ni zel tur leh mahni inthununa, hmasawn zel tura tan la turin a fuih a ni.

Pu Lalchamliana chuan Mizoram Police te chu hripui leng kaihhnawih thil hrang hrang - ramri leh quarantine centre venna kawngah te, contact tracing lamah te, inkharkhip laia dan leh thupek kenkawh kawngah te an hnathawh leh inpekna chu fakawm a ti a, sawrkar pawhin a chhuang hle tih a sawi. Police lak chungchangah Home Minister chuan Police la thar turin theihtawp chhuahin hma an la mek a, mahse hripui lengin sum leh pai dinhmun thui tak a nghawng avangin tun dinhmunah chuan rem lohna a awm rih a ni, a ti a. Sawrkarin Police a lak hunah a zau thei ang berin chanchinbu leh TV kaltlangin a chhuah dawn a, District tinah Recruiting Centre siamin, District mipui mila lak dan te ruahman tum a nih thu a sawi a ni.

Home Minister chuan Mizoram Sawrkarin a phak tawkah a tha thei ang bera hnathawktute hamthatna (welfare) pek a duh niin a sawi bawk.

DGP Pu SBK Singh pawhin thu sawiin Constable te Head Constable ah an kaisan theihna chhan chu Chief Minister, Home Minister leh Chief Secretary ten awm tiin theihtawp an chhuah vang nia sawiin an chungah lawmthu a sawi a. Hnathawk reng reng ten a hun taka an dawn leh hmuh tur ang te an hmuhin phurna nasa zawk a pe thin a, chu chu an hnathawhah pawh a lang chhuak thin niin a sawi bawk

He programme hi Pu John Neihlaia, IPS, IGP (Hqrs.) in kaihruaiin hma an lak dan tlangpui a sawi a. Pu L. H. Shanliana, IPS, IGP (Law & Order) in lawmthu sawiin hun a khar a ni.

Vawiina Constable atanga Head Constable a kaisang hi mi 161 an ni a, a tam zawk chu Unarmed niin kum 20 chuang thawk vek tawh te an ni. Mizoram Police sanctioned strength hi 12,206 niin thawk lai mek 8750 an awm a, post 3456 ruak an nei mek a. Post ruak awm mek hi post za zelah 28.13 bawr vel a ni a. Heng zinga hian post 2809 te chu Constable leh IV Grade post te an ni, chung zinga post 595 lak tumna hi a kal mek a ni.

Kum khat chhungin Mizoram Police hian kawng hrang hranga hma lain thil thar chhawpchhuah an nei nual a. Chungte chu – Mizoram Safety App te, All Women Police Station te, Canine Dog Squad te, Cyber Crime Cell te, Tourist Police te, Social Medio Cell leh a dangte a ni.

Attachment

  • Loading attachment...