No.5885/2020-2021

Vawiin khan Agriculture Minister Pu C. Lalrinsanga chuan Indian Council of Agriculture Research hnuaia ‘Best Women Scientist Award 2020’ dawngtu Dr. Michelle C. Lallawmkimi leh ‘Young Scientist Award in Horticulture 2020’ dawngtu Dr. Malsawmkimi te chu a pisa-ah an award dawn lawmpuina hun hmanpuiin chawimawina thuziak a hlan.

Agriculture Minister Pu C.Lalrinsanga chuan Award dawngte chu mimal leh sawrkar anga a lawmpui tak zet thu a sawi a, Mizo te zingah ram pum huap chawimawina dawngthei Agriculture leh Horticulture Scientist an awm chu a chhuangin, thalaite tan chona ni se, a tih thu a sawi a. Minister chuan Krishi Vigyan Kendra (KVK) Scientist te chu loneitute thian, an harsatna sutkian kawngah nasa taka pui thin tu leh, thlai thar (yield) an neih ngah theih nana an thiamna leh finna te engtik lai pawha pe chhawng zel thin tu te an ni, a ti a. KVK Mizoram -ah hian state danga an kalpui ‘lab to land’ hmangin hlawk zawka loneituten thlai thar leh ranvulh lamah hma an sawn theihnan scientist te hian hma an la mek a, Indian Council of Agriculture Research in technology a pawmpui hmangin leh a ram leilung zira her remin loneitute hnenah hian thlai chindan tha zawk an zirtir thin a, Indian Institute of Sugarcane Research a mithiamte nena tangkawpin, Khawlailung-ah Fu (sugarcane) production tih changtlung nan Mizoram sawrkar chuan KVK kaltlangin rahbi a la mek a ni, a ti a. Agriculture Department in a enkawl mek, ATMA leh FOCUS hmalakna thenkhat te pawh KVK Mizoram chuan a chhawndawm zela, chak zawka schemes hrang hrang kalpui dan pawh a in hawng zel dawn a ni, a ti a. Minister chuan Mizoram KVK hmalakna zingah sunhlu, theihai, khawizu processing te chu chhuanawm a tih thu leh, Sentetfiang khuaa an khawizu lak pawh khawizu tui danglam bik a nih thu a sawi a ni.

Kumin September Ni 26-28 chhung khan 2nd National Conference of Society of Krishi Vigyan chu Webinar hmanga India ram pum huapa neih a ni a. He Conference-ah hian Mizo Scientist pahnihte hi heng award hi hlan an ni.
Dr. Michelle C. Lallawmkimi hi KVK Kolasib-ah Senior Scientist and Head niin Agriculture, Horticulture, Animal Science, Plant Protection, Agro-Forestry, Soil Science, Agriculture Extension leh Home Science ah te kum nga kalta chhunga a hnathawh that avangin Best Women Scientist Award 2020 hi hlan a ni. A hmalakna avangin Mizorama la awm ngai lo Women Farmers’ Club chu Kawnpui-ah din a ni a. A kaihhruaina hnuaiah KVK Kolasib chuan kum 2017 khan New Delhi-a Krishi Unnati Mela-ah North East ai an lo awh tawh a, hetah hian Best Stall lawmman te a lo lakpui tawh a ni. India rama ranking sang ber ‘A Grade Accreditation’ chu NITI Aayog hnuaiah, KVK Kolasib chuan a lo hlawhchhuak tawh bawk a ni.

Dr. Malsawmkimi hi KVK Khawzawlah Horticulture-a Subject Matter Specialist niin ani hian Young Scientist Award in Horticulture 2020 a dawng a. Tun kum nga kalta chhunga Horticulture lama a hnathawh that avanga he Award hi dawng niin loneitute harsatna sutkian kawngah hma a la nasa hle a. Horiticulture thlai variety thar siamchhuah kawnga leh scientific cultivation neih theih dan kawngah loneittute tan a thawh hlawk hle a. Tomata variety thar Arka Rakshak leh Arka Samrat te hi Dr. Malsawmkimi chin chhuah niin heng kawnga a hlawhtlinna avangin a a farmer enkawl pakhat chuan ICAR hnuaiah Best farmer Award pawh a lo la tawh a ni.

Minister hi Agriculture Commissioner Pu Lalhmingthanga, Agriculture Director (R&E) Dr. Saithantluanga, Agriculture Director (CH) Pu Rohmingthanga Colney leh midang ten an tawiawm a ni.