Nimin (1.6.2016) chawhma dar 11 khan Champhai D.C. Conference Hall-ah District Bawrhsap Pu Vanlalngaihsaka IAS kaihhruaiin District Fire Prevention Committee an thu khawm a. Kangmei ven kawnga hmalakna leh a hlawhtlin dante thlir ho niin kangmei ven kawnga titha berah Aiduzawl khua thlan a ni a, Teikhang leh Kelkang khua ten an dawt a ni. He meeting-ah hian member-te an tel tha hle.

Meeting kaihruaitu District Bawrhsap Pu Vanlalngaihsaka, IAS chuan khaw tam zawkin kangmei ven kawnga sawrkar thuchhuak an ngaihpawimawh em em laia khaw thenkhat sawrkar thuchhuak pawisalo an awm chu pawi a tih thu a sawi a. Committee chuan sawrkarin lo hal hun a ruat hnu lama lo hal te, mei lam sial that loh avanga ram tikang te leh sawrkar phallohna hmun lo atana vat te chu dan an bawhchhiat chhante sawifiah tura koh nise, a ti a. Hun lo kal zel turah mipuite kangmei ven kawnga an thangharh theih nan sawrkar dan dinglaite khauh taka kenkawh ni se, a ti bawk.

Meeting-ah hian Champhai District chhunga khaw hrang hrangten kangmei ven kawnga hma an lak dan tarlan niin hmala tha berah Aiduzawl khua thlan a ni a. Teikhang khua chu pahnihna niin Kelkangin pathumna an hauh a. Heng kangmei ven kawnga titha thlanchhuah khaw pathumte hi lawmman hlan an ni dawn a ni. Meeting-a tarlan a nih angin Champhai District chhunga khaw 8 in lo atana an vah bak ram an ti kang a. Lo hal hun tura huntiam hnulama lo hal lui khaw 6 lai an awm bawk.

Attachment

  • Loading attachment...