Vawiin chawhma dar 11:00 khan Champhai Town Hall-ah Mizoram Apex Handloom & Handicraft Co-operative Society Ltd. (MAHCO) bul tumin District Handloom Fair chu ropui takin Champhai District Bawrhsap Pi Lalthangpuia Sailo, IAS in a hawng.
Hawnna thu sawiin District Bawrhsap chuan Champhai ah MAHCO in Handloom Exhibition an rawn hawng chu lawmawm a tih thu sawiin MAHCO hi kum 1977 ah din tan niin, society in a tum ber chu puantah leh kut themthiamna te hmanga eizawngtute chawikan hi a ni a ti a. Chunga eizawngtu ten hna an thawh theihna turin Mizoram leh Foreign atang pawhin hmanrua (materials) MAHCO Ltd. kaltlang hian lakluh an ni a. Chung bungruate chu Market rate aia tlawm in a mamawh tute hnenah pek chhuah leh a nih thu leh chuta tanga an deh chhuah te chu lei khawm sak leh in Mizoram chhung leh pawn lamah te a tih ral dan MAHCO chuan a ngaihtuah sak leh thu a sawi a.
Sawrkar pawhin Handloom leh Handicraft lama eizawngte a ngai pawimawhin School Education lam pawhin Zirtirtute puan bih ni hial te a siam a. YMA leh pawl dang dang te pawhin mipuite hnenah mahni hnam incheina ngai pawimawh turin a chah reng bawk nen, hengte pawh hi helama eizawngtute tan market tha tak a lo nih zel thu DC Pu Lalthangpuia Sailo chuan sawiin, Handloom Exhibition chu a duh apiang lei theih turin a hawng nghal bawk a ni.
Pi K. Laldingliani, District Information Officer pawhin thu sawiin kan hnam incheina a bikin Mizo puan humhalh a tul thu uar takin a sawi a. Tunlai kawr chei nana Mizo puantah nalh tak tak nen a thui pawlh thin chu, a mizo in a nalh a tih thu sawiin, kan hnam puanro Puanchei leh Ngotekherh bik erawh hi chu cheh sawm mai mai phal lovin, puan bik emaw puan ven atan emaw hmanga tih nawmnah ni lo se. Mizo puan hnam ro bik a nih ang a, humhalh tlat ni thei se a duh thu a sawi a ni.
He exhibition hi Pu K. Lalthanpara, ARCS, Champhai District in kaihruaiin, Pu K. Rothawmliana, Manager, MAHCO chuan lawmthu sawiin hun a khar a ni. He Handloom Exhibition hian vawiin atanga ni 27.9.2013 thleng a awh dawn a, Mizoram hmun hrang hrang atangin puan nalh tak tak leh kutthemthiam lam thil tha tak tak man tlawm takin an pho chhuak a. Tlawhtu pawh a ngah nghal hle a ni.
