3007/2024-2025

Champhai, 14th November 2024: Vawiin khan Champhai District Hospital chuan India rama sawrkar damdawiin ṭha tehna ‘National Quality Assurance Standards (NQAS)’ tehfung hmanga endik an nih hnua ‘National Quality Assurance Standards Certification’ an hmuh lawmna hun an hmang a. Adviser to CM, Champhai North bialtu ni bawk Er. Ginzalala leh Champhai South bialtu Lt. Col. Clement Lalhmingthanga ten he hun hi an hmanpui a ni.

National Quality Assurance Standards (NQAS) hi National Health Mission hnuaia mi a ni a, India rama sawrkar damdawiin (District Hospital, CHC, UPHC, PHC) te ṭhatna leh damlote himna tehna a ni. NQAS hnuaiah hian tehfung (checkpoints) 462 awmin, March ni 21 leh ni 22 khan State pawn aṭanga lo kal, NQAS External Assessor, Ministry of Health & Family Welfare, Govt of India rawn tirh te chuan Champhai damdawiin hi an rawn endik a ni. District Hospital endik tura National Assessor ko lut tur hian State Level-ah endikna paltlang phawt a ngai a, State Level endikna paltlang hnu thla ruk chhunga koh tur niin, National Assessor te lo kal hun tur hi hriat lawk theih a ni lo a ni. Champhai District Hospital hian endikna tehfungah hian za zela 87% an hmu a. Mizoram damdawiinah NQAS Certification hmu thei hi Champhai District Hospital bakah Aizawl Civil Hospital, Lunglei Civil Hospital, UPHC 2 leh PHC 3 te an awm tawh a ni.

OPD Complex-a lawmna inkhawm neihah khuallian Er. H. Ginzalala chuan NQAS Certification hmu theia Champhai District Hospital an inhlangkai chu ropui a tih thu sawiin, thawktu ten tha thlah lova an inpekna rah a ni tiin an kal zelna turah duhsakna a hlan. Adviser to CM chuan Mizoram sawrkar chuan Champhai District Hospital mamawh te a hriatpui tih pawh sawiin, Orthopaedic Surgeon pek tum an nih thu te, Nursing College sak nan cheng nuai zahnih ruahman tum a nih thu te a tarlang a.  Damdawiin mamawh Generator chu Champhai South bialtu MLA Lt. Col Lalhmingthanga nen ngaihtuah sak an tum thu pawh a sawi bawk. 

Er. H. Ginzalala chuan Aizawl Civil Hospital tawt lutuk tihziaawm nan a thil pawimawh tak chu District Hospital te tihchangtlun a nih thu sawiin, he mi atan hian sawrkarin ngaihtuahna thui tak a sen tawh thu a sawi bawk. Champhai North bialtu hian Mizoram run mektu HIV/AIDS lakah mipuite chu inveng turin a ngen a, “Faina leh taksa invawn kawngah mawhphurhna thui tak mitinin kan nei ṭheuh a, natna tam tak chu fimkhurna leh thianghlima hmanga inven theih a ni,” a ti. Er. H. Ginzalala hian Champhai District Hospital NQAS Certification lawmpui nan cheng singhnih a hlan. 

Khualzahawm  Lt. Col. Clement Lalhmingthanga pawhin he hunah hian NQAS Certification hmu thei tura Champhai District Hospital-a thawktute thawh hahna chu ropui a tih thu sawiin, an ṭhahnemngaihnaah mipuite aiawhin lawmthu a sawi a.  Champhai District Hospital chu Champhai North AC huamchhunga mi ni mah se, Champhai District mipui zawng zawng te ta anih angin a chhiat a ṭhat chungchangah amah ngei pawh a intineitu hle a ni tih a sawi. Damdawiin mamawh leh hnufualna te chu sawrkarin a hriatpui a, a tahtawla an harsatna te sukiang turin theihtawp chhuah zel an tum thu sawiin Lt. Col Clement Lalhmingthanga chuan Nurse indaihlohna phuhru turin Nurse pahnih a rawihsak tur thu he hunah hian a puang a ni.

Champhai South bialtu MLA hian NQAS certification lawmpui nan Damdawiin hotute hnenah cheng singhnih ( ₹20,000 )a hlan bawk a ni. 

Champhai District Hospital NQAS Certification lawmna hun hi Dr. Zatluanga, District Medical Superintendent chuan a kaihruai a. Dr. Biakthansangi, Sr. Specialist leh Pi Lalhmangaihzuali,  District Hosptal Quality Manager ten District Hospital leh NQAS chungchang report an pe a. Pi H. Vanlalhumi, Nursing Superintendent-in lawmthu sawina hun a hman zawhah inkhawm hi tihtawp a ni.