3006/2024-2025

2024 Sahmulphah thla ni 14: Vawiin khan Lunglei District Cooperative Union Ltd (LDCU) buatsaihin All India Cooperative Week vawi 71-na pualin YMA Sub-Headquarters Conference Hall Lungleiah hun hman a ni a, Lunglei High Powered Committee (HPC) Vice Chairman Pu V. Malsawmtluanga MLA chuan Khuallian niin a hmanpui.

Khuallian Pu V. Malsawmtluanga chuan cooperative society member kal khawmte chu All India Cooperative Week chibai bukin, Lunglei District-a society tin chuan Bana Kaih (Hand Holding) policy chu ngaihvenin chhawr ṭangkai se a duh thu a sawi a. Society tam tak hlawhchham chhan chu rinawmna tlakchham vang a ni tiin, inrin tawn lohna leh sum tihchingpen avang te'n society tam tak an tlu chhia tih a sawi a. Ṭanpuina sum dawn nan ringawt ni lo, hlawhtling tak tak tura society din duhna rilru put thar a ṭul tih sawiin, Mizo ṭhalaite'n society hmanga ei zawnna leh hmasawnna kawng zawh pawimawhzia leh a ṭangkaina te an hriat zel theih nan society-a inhmang mekte chu theih tawp chhuah turin a chah a. LDCU hmasawnna tur leh an mamawh hrang hrang atan HPC Fund chhuak leh tur aṭangin hma lakpui an nih tur thu a sawi bawk.

"India hi ram changkang a nih theih nana cooperative-te chanvo" tih thupui hmanga hun buatsaih hi LDCU President Pu Darlawma'n kaihruaiin, Co-opted Member Pu Lalawmpuia'n hunserh a hmang a. Lunglei District Cooperative Officer (DCO) Pu S. Lalremngheta'n thu a sawi bakah, Government J. Buana College Department of Commerce-a Head of Department Dr Vanlalmuana'n "Mizoram Bana Kaih Scheme" chungchang presentation a pe a. Zawhna leh chhanna hun hman niin, Mizoram State Policy Coordination Committee (MSPCC) Member Pu LP Lalchangkima chuan zawhnate hi a chhang a. Chawhnu lamah cooperative society-te account vawn dan tur, Cooperative Acts & Rules leh PACS pawimawhna te zir ho niin, LDCU Executive Officer-cum-Secretary Pu K. Malsawmdawngliana, CAO Pu R. Lalliantluanga leh Mizoram Cooperative Apex Bank (MCAB) Vice Chairman Pu Lalrinchhana te'n training hi an pe a ni.

All India Cooperative Week 2024 hi November ni 14 aṭanga ni 20 thleng lawm a ni ang.