3005/2024-2025

Saitual, the 14th November, 2024: State Disaster Management Authority (SDMA) leh District Disaster Management Authority (DDMA) tangkawp buatsaihin vawiin khan Saitualah leimin leh ramkang thlen thulha chetlak dan tur nunchan zirna (Mock Drill) hlawhtling taka neih a ni.

Zing dar 10:00 am khan Saitual district ah ralkhel dar (siren) tihrik niin, Saitual town area-a District Hospital, DC office hlui, District jail road leh Keifang NH06 road ah te leimin leh ramkang vanga mihring hliam chhanchhuak tura hmalak dan leh rang taka chetlak dan tur entirna neih a ni a. Chhiatna thlenna hmunah hian police, ambulance leh lirthei tul apiangte tirh chhuah nghal niin Quick Response Team (QRT) te chuan hliam tuarte enkawlna pein a na zualte leh mitthite chu ambulance hmangin Saitual district hospitalah an phur thleng a, damdawiina thawkten hliam tuarte an lo buaipui nghal a ni.  

Chhiatna thlenna hmun paliah hian incident commanders atan Er. Laldinsanga Hnamte, DUDO, Pu C. Lalfakzuaka, SDO, PWD, Pu Jonathan Lalhruaitluanga, RO, Dr. Zothanpari Chhakchhuak, Sr. MO te ruat an ni a. Observer atan hian Pu Lalnunpuia, Superintendent, Pu Peter Biakthansanga, RO, Pi Christina Lalnunfeli, SDC, Pu James Lalthangmawia, DCPO, DCPU te ruat an ni. Staging Area manager atan Pu V. Laldinsanga, Project Director, DRDO chu ruat niin Head Observer atan Pu Lallawmawma, Addl. DC ruat a ni bawk. DC Conference Room, Saitualah District Bawrhsap leh DDMA chairman ni bawk Dr. Lalngura Tlau chuan chetlakna te lo thlithlaiin incident commanders te nen an inbe pawh reng bawk a ni.   

Mock drill neih zawhah hian chawhnu dar 2:30-ah District Bawrhsap hoin incident commanders leh observers te chuan video conference hmangin vawiin mock drill thlir letna (review) meeting an nei nghal a ni.