3004/2024-2025
Dated Serchhip, the 14th November, 2024: Vawiin khan Mizoram pumah Mega Mock Drill neih a ni a. Serchhip District Disaster Management Authority (DDMA) pawhin zing dar 10-a tanin ruahsur nasain a nghawng leimin, building tluchhia leh ram kang avanga chhiatna thleng hmachhawn dan tur an zir a. Serchhip DDMA Chairman Pu Paul L. Khuma kaihhruaiin chetlak dan tur leh chhanchhuahna hna thawh dan tur an zir a ni.
Zing dar 10 ah siren riin District Emergency Operation Center (DEOC) ah Incident Response System (IRS) tihnun nghal a ni a. Chhiatna thlen dan leh report luh dan chu hetiang hi a ni:
Zing dar 10:06 ah Serchhip Hmar Vengah leimin nasa tak a awm thu Hmar Veng VCP in Serchhip Bawrhsap, Responsible Officer (RO) ni bawk hnenah a report a. RO hian Incident Commander atan Additional DC Pu Lalrinzuala a ruat nghal a. DEOC ah DDMA member te leh Incident Response Team koh khawm nghal an ni.
Hemi hnu hian RO hian Field Veng VCP hnen atangin Serchhip Auditorium chim thu te, Headmaster hnen atangin Presbyterian English School building chim thu te, DMS hnen atangin Hospital Trauma Ward chim thu te leh New Serchhip South-a ram a kan thu a indawtin a dawng chhunzawm a. Staging Area Manager ruat nghalin chhanchhuahna hmanrua te, ambulance te, ei tur leh bungraw mamawh zawng zawng Leisekawt Field ah dahkhawm nghal a ni a. Manager hian mamawhna hmun apiangah mamawhte semchhuakin, chhanchhuahna hna thawk turin search and rescue team te a tir chhuak nghal a ni.
Serchhip khawpui chawmtu 11kv line chhiaah Power and Electricity team te tirh an ni a. Fire and Emergency Services te hi ram kang thelh tura tirh nghal an ni bawk a. Kangmei hi hmun hnih - New Serchhip South ah leh Presbyterian English School bulah a chhuak a ni.
Chhiatna thlenna hmun tinah hliam tuarte chhanchhuah hna leh nunna chante lakchhuah hna thawh a ni a, site incident commander dah vek an ni bawk. Hliam enkawlna tur hospital phuahchawp siam niin hliam tuar engemawzat zawn luh an ni a. Serchhip Indoor Stadium ah Relief Camp buatsaih a ni a. Chhiatna thlenga thite ruang endik (confirm) turin magistrate leh police te an kal a. Khawpui lun lai, chhiatna thlenna hmunah te hian mipuiin chhanchhuahna hna thawkte an chim buai loh nan police-ten hrui pawtin venhimna hna an thawk bawk a ni.
Mock Drill neih zawh hnu hian Serchhip Pisapui Hall atangin State Level buatsaih tlirletna (debriefing) hun chu video conference kaltlanga chhim zui a ni a. RO chuan report a pe a. Serchhip District inpuahchahna leh hmalak dan te tha an tih thu leh mawhphurtuten an chanvo tha taka an hlen chhuak ni a an hmuh thu an sawi a ni.
DC hoa review meeting neih zui niin member kalkhawm ten an hmuh dan an sawiho a.Felhlel lai leh siamthat ngai nia an hriat te siamthat dan tur leh hmasawn dan tur rawtna te an ngaihtuah ho a.
He Mock Drill ah hian Police, Fire & Emergency Services, H&FW, MPRO, Quick Response Team, PHE, Power & Electricity Department, BSF, Assam Rifles, Ex-servicemen, PES zirtirtu leh zirlai te, Adventure Club, department hrang hrang atangin official te, VC, tlawmngai pawlte leh mipui mimir engemawzat an tel a. Serchhip DDMA Chairman Pu Paul L Khuma chuan mawhphurtu zawng zawng te, khawtlang hruaitute, school hotute leh Serchhip khawtlang mipuite hnenah lawmthu a sawi a ni.
