Vawiin khan Pu Zoremthar Ralte, DTO Champhai kaihhruaiin I&PR Conference Hall, CHANEM Building-ah Champhai District chhunga lirthei chungchang leh a kaihhnawih hrang hrang ngaihtuaha  inrawnkhawmna hun neih a ni a. He hunah hian Champhai District chhunga Tlawmngai Pawl aiawh, khawtlang hruaitu aiawh leh mipui phur lirthei neitu hrang hrang hruaitute an tel a ni.

He hunah hian Champhai khawpui chhunga  mihring phur chi lirthei Permit pek belh chungchanga State Transport Authority (STA)-a rawtna thlen tur hrang hrangte sawiho a ni a. Champhai District chhunga District Headquarters thar pahnih siam a nih tak avangin Champhai District huam chhung bika lirthei mamawh zat tur tlangpui rawtna thlen turah hetiang hian rawtna siam a ni.
 
1) Thingtlang khuaten District khawpui awlsam zawka an kal theih nan Maxi Cab permit pek belh tura rawtna thlen tha tih a ni a. Hemi chungchang hi DTO in a awm sa te lo zirchianga a zat tur hi chu lo bituk se tha tih a ni a. Tuna Inter District Maxi Cab Service awm mek 250 vel erawh dil belh rih loh phawt ni se tha tih a ni thung a.

2) District khawpuia Town Bus permit pekchhuah sa bakah mipui mamawh phuhru turin Town Bus permit hi panga (5) pek belh tura rawtna thlen tha tih a ni a.

3) Champhai khawpui chhunga Taxi tlan mek 200 vel bakah hian permit 20 pek belh leh tura rawtna thlen ni se tih a ni bawk a.

4) Champhai khawpui chhunga Auto-Rickshaw service lai 300 vel awm mek bakah hian 30 vel tal permit pek belh tura rawtna thlen ni se tih a ni a.

5) Champhai khawpuia mipui mamawhna phuhru turin Two Wheeler Taxi permit hi 30 vel pe tura rawtna thlen ni bawk se tih a ni bawk a.

Mihring phur chi lirthei-ah pollution certificate hi neih ngei a ngaih avangin Champhai District-ah Pollution Testing Centre a rang thei ang bera Sawrkarin dah tura thlen ni se ti a  rel a ni a.
Myanmar ram atanga lakluh Two Wheeler, Kenbo 125cc hi ramri hrulah kuhnathawktuten tangkai taka an hman lai mek anih laiin dan ang taka lakluh leh register a ni lo thung a. He lirthei neitute leh mipui him zawk nan dan ang taka hmalak anih theihna turin Sawrkarah rawtna thlen tha tih a ni bawk.

Vawiin meeting-ah hian  Pu C.Lalsawta, SDPO leh Pu K.Lalrinsanga, MVI Champhai leh Champhai-a Traffic Police hotute pawh an tel a ni.