Ramchhung economy dinhmun leh hmasawnna tur atana Prime Minister thurawn pe tura a bika din Economic Advisory Council to the Prime Minister (EAC-PM) Member Secretary Pu Ratan P. Watal leh Adviser Pu Rajeswara Rao ten vawiin khan Aijal Club ah Mizoram Sawrkar hotute kawmin Mizoram Economy thang tura hmalak dan tur te leh hmasawnna chak zawka kalpui anih theih na atana pawimawh te an sawiho.

He hunah hian Mizoram Chief Secretary charge la mek tu Pu Ashish Kundra chuan presentation pe in Mizoram ei leh bar a kan dinhmun leh eizawnna kawnga kan dinhmun tlangpui a tarlan bakah Mizoram hmasawnna tur leh India hmarchhak hmasawnna atana Mizoram tangkai theih dan chi hranghrangte a tarlan bakah Mizoram atanga tharchhuah leh siamchhuah te an tangkaina leh thatbikna bakah an hlutna te, a hralhchhuahna atana tihtur pawimawh te a tarlang a. Kawng tha kan mamawhzia te, Tui leh kawlphetha a kan intodelhna atana hmalak dan tur te a. Look East Policy tihlawhtling tura Mizoram kaihhnawih thil pawimawh tak tak sawiho a ni a. Mizoram tihhmasawnna atana pawimawh leh ruahmanna hrang hrangte zau taka sawiho a ni.

EAC-PM Member Secretary Pu Ratan P. Watal chuan tun dinhmun aia nasa zawka Mizoram a than dan tur ngaihtuah chu an ngaihpawimawh anih rualin India hmarchhak pumpui than dan nen kan thlir kawp a ngai a nia  ti a. Mizoram chu ram zim te, mihring tlemna anih rualin India ram nen khaikhinin hnathawk thei thalai population a sang hle a, hei hi thil lawmawm tak a ni a,anihna tura  chhawr tangkai anih phawt chuan hmasawnna hna thawh pawhin awmzia a nei thui dawn a ni a ti a, tun dinhmuna pawimawh ber pakhat ni a a hriat chu inkalpawhna chin hrangbhrang – kawngpui, tui kawng, boruak kawng leh rel kawng tihchangtlun a ni a ti a, hetih rual hian Internet connectivity tihchangtlun a pawimawh hmasa hle a ni a ti. Pu Watal chuan kawlphetha leh tui chungchangah sawrkar laipuia Ministry pawimawhte nen awmze nei leh ko ri tu zawka thawhho dan ngaihtuah a tul dawna a hriat thu sawiin hmasawnna hna chak taka kalpui hian kawng lehlamah a man pek ngai hi a awm thin a, Mizoramah pawh kum kalta chhunga ramngaw awm sa tihchhiat zat percentage sang lutuk chu veiawm a tih thu sawiin ramngaw leh sik leh sa tichhelo thei ang ber tura hnathawh dan kawng zawn a tul a ni a ti a. Tourism project hrang hrang Mizoramin a ruahman te pawh kalpui dan a fuhloh chuan kum 10 lek chhungin kalpui zui tlakloh leh hluihlawn thilah a chang thei a ni a ti a. Sawrkar laipuiin sum engemawzat India hmarchhak tan leh tribal te tan kumtin a ruahman thin a, heng ho hmanna tur scheme leh programme mumal a awm thin lo tih a mit ngeia  a hmuh thu leh a vei thin thu a sawi a, pawisa chu a awm, a hmanna tur ruahmanna hian a daih lo thin a hei hi a mawhphurtu ten tan lak nan hmang se a duh thu a sawi a ni.

EAC-PM adviser Pu Rajeswara Rao pawhin Mizoram chu hmasawn tura theihna leh mamawh nei tha ni a a hriat thu sawiin EAC-PM chu thutlukna siamtu an nih loh thu leh Prime Minister hnena thurawn petu an nih thu sawiin sawihona eng hrang hrang atang Mizoram tana mamawh leh India hmarchhak tana mamawh te an chhinchhiah thu a sawi a ni.

Vawiin inkawmhona ah hian Mizoram sawrkar hnuaiah hmasawnna hna thawktun leh ngaihtuahtu department hrang hrang aiawhte an tel a, an ruahmanna leh mamawh pawimawh te an sawi bakah harsatna an tawh chi hrang hrangte an sawi a, heng zingah hian ampawn atanga Mizoram kaltlanga kuhva tawlh vanga harsatna te, inkalpawhna leh inbiakpawhna that tawkloh vanga harsatna te, sik leh sa inthlak leh ramngaw tuihchereu vanga harsatna te pawh sawilan a ni.