He thu hi Law Minister leh Champhai South bialtu MLA nibawk Pu TJ Lalnuntluanga'n a bial chhung Champhai Kanaan, Dinthar leh Vengthar a tlawh tuma a sawi niin, Vawiin hian Minister hian a bial chhung fan kalzel program chu a khar a ni.

Minister chuan a bial mipuite chu  kalpah mai nilo a hnathawh tak tak duhna rilru pu tura fuihin,  tunhnaia  tharthawh leh Champhai Town Plan leh Seling-Champhai kawng double lane a zauh tuma hmalaknate pawh tihtak takna nena bawhzui anih hnuah chauh peihfel thei tura beiseina neih anih thu a sawi a. Khawtlang mamawh te sawiho hmasak phawt hnuah a tul anga thuneitute dawr thin a finthlak a, rualkhai taka hmasawnna bial chhunga a awm theihna turin inrawnkhawma  official te thawhpui thin angai ani tiin, " Mipui aiawha thlan ram hruaitute, thiamna, remhriatna leh tawn hriat tam tak nei Sawrkar official leh mipuite an thawhho that phawt chuan ramin hmasawnna duhawm leh kawng dik tak a zawh thei dawn a ni, a ti a. Rilru puthmang  dik hmasawnna  'Moral development'  chu hmasawnna hmahruai anih angai a, hemi hnu chuan hmasawnna dang ten kawng dik tak a zawh thei tawh dawn ani, Law Minister chuan a ti a. Ram changkang tawhte nena State  dinhmun  tehkhin chu  a fuh ber loh thu leh sawrkar laka beisei neih dan chin pawh  thiam angaih thu a sawi bawk.

Law Minister chuan duhamna leh a thlawna sum dawn duhna thinlung avangin hlemhletna leh duhamna a awm theih phah ani tiin, anihna tur ang taka  hnathawhna tur sum hman loh vangin corruption a pung phah ani, a ti a. Inthlan laia sum hman nasat lutuk vang leh midang sum hmansak chuan ba a siam a, chu chuan eirukna a siam thei a, NGO, Kohhran leh mimal atanga a thlawna  hamthatna  beisei thinnain corruption a then theih thu a sawi bawk. Sum  leng vak  leh hamthatna awm angte a mamawh ngawih ngawih rethei leh pachhiate chauh puih anih theihna tura tanlak angaih thu a sawi a. Kalkhawmte chu bial  entawntlak, intodelh, rinawm leh dik taka thawk tur leh midangte tana malsawmna nih tum turin a chah a.

Pu TJ Lalnuntluanga chuan mipui tan Aizawl a Office dawr tura kal a harsat vangin Sawrkar Pisa hung hnaia indawrna hun siam ani chu bial mipuiten tangkai taka an hman a beisei thu a sawi a. Langtlang taka thil tih theih leh theih loh bakah nghah ngaite thlenga inhrilhhriata, theih loh leh nghah ngai awmah mipuite   dawhthei taka awm turin a chah a. Mahni ke a ding thei tura intodelh tum tur leh hlemhletna leh duhamna ata inthiarfihlim turin a fuih  a. Bial fan atangin amah ngei pawhin  ngaihtuahna thar leh tawnhriat a neih belh zel thu tarlangin, mipuite mamawh thlen atangin hmalak zel dan tur thui tak hriat  theih  anih thu a sawi a. Dik leh fel taka bial  tana a thawh theihna tura tawiawm tlat turin a sawm nghal a ni.

Vawiin Mipui leh Sawrkar inpawhtlang taka indawrna hmang hian harsatna leh mamawh thlente tih theih anih leh nih lohte tlang taka sawiho a ni a. Hmalak dan turte leh kawng hmangte inhrilhhriata sawiho a ni bawk.  Minister hian Dinthar Veng Primary Sikul, Middle Sikul leh Playground buatsaih mekte, Pinehill Adventist Academy, New Champhai leh Vengthar khawchhung inkalpawhna leh tuikawng harsatnate a enfiah nghal bawk a ni.

Minister Pu TJ Lalnuntluanga hi Pu Alexander V.Chongthu Addl  DC;  Pi Ethel Rothangpuii, PD DRDA;   Pu K.Lalhmuakliana, DLAO/DUDO; Pu Lalduhthlana, DFO; Pu B. Lalbiakthuama, EE PWD; Pu Laldingliana Hrahsel, EE I≀ Pi Lucy Lalrinpuii, DFDO; Pu Lalengliana Chhangte, DSP (Hqtrs); Pi Rebecca Laldinmawii Hrahsel, BDO;  Pu Lallawmkima, DIPRO;  Pu Lalremmawia Colney, SDAO; Pu Vanlalvuana Rokhum, SDHO; Pu Vanlalmuanawma, SDO, PHE; Pu C.Lalthianghlima, SDO, I&WR ten an tawiawm a ni.