2191/2022-2023

Champhai, the 5th October, 2022: District Level Cleanliness Week Celebration Committee (DLCWCC), Champhai District-in faina hapta hman chhunga hmalakna tura a duan bawhzuiin member-te chuan vawiin khan an Chairman Pu James Lalrinchhana, District Bawrhsap hovin bawlhhlawh thliarhrana sawngbawlna hmun leh faina hapta hnatlangte an tlawh.

District Bawrhsap Pu James Lalrinchhana chuan bawlhhlawh tawih thei leh thei lo thliarhran chu FOCUS project kaltlanga  loneitute hnena leitha siam dan inzirtirna kalpui tum nena kalkawp thei a nih thu sawiin, leitha sem ngawt nilo, a siam dan inzirtir chu nakin zel atana pawimawh a ni, a ti a. Bawlhhlawh tawih thei leh thei lo thliar hran chu leitha siam kawnga pawimawh hmasa a nih thu a sawi bawk. Bawlhhlawh paih mai mai tur atanga thil hlu leh tangkai zawk siam, 'waste to wealth' chu ngaihpawimawha chhawr tangkai thiam a pawimawh thu a sawi bawk a. Faina hapta puala veng hrang hrangte hmalakna fakawm a tih thu sawiin, Champhai district fai leh thianghlim siam kawnga theihtawp chhuahpuiah district mipuite a sawm a ni.

Faina hapta hman dan tura duan zingah a ni 4-na, vawiin October ni 5 hian mimal leh pawl anga bawlhhlawh sawngbawlna kalpuite District Level Committee member-ten tlawha enfiah nise tih a ni a. Enfiah tura ruahman zingah bawlhhlawh thliarhran kawnga Tlangsam khawtlang leh Hawilo SHG Ruantlangte hmalakna chu ruahtui tlain a panna kawngah harsatna a siam avangin tlawh theih a ni rih lo a, mimal bawlhhlawh thliarhranna kalpui zinga mi Pu Vanlalthafamkima, Champhai Vengthlang hmalaknate tlawhin an zirchiang a ni.

Champhai khawpui veng chhung hmun hrang hrangahte faina hnatlang leh cheimawi hnate kalpui mek zel a ni a. Heng bakah hian Chhungte VC te hmalaknain veng chhung intinah bawlhhlawh tawih thei leh thei lo thliarhranna tur bawlhhlawh bawm 'twin bin' sem vek a ni tawh bawk. 

Vawiin vek khan DLCWCC Member-te chuan Solid Waste Management Centre (SWMC) tura ruahman Mualkawi ram ami an tlawh a. Chhungte khaw bula UD&PA bawlhhlawh paihna thin chu kawngpui siam a nih avangin paih theih a ni tawh lova, khawpui bawlhhlawh khawnkhawmte paihna tur hmunhma mamawhna a nasat em avangin helai hmunah hian paih lailawkna tur siam a ni a. Hnawm paih liamna awm mek 1 belhchhahna tur 4 dang siam dan turte ngaihtuahho a ni a. Hnawm paih turte chu a paihna tura ruatah paih liam zel turin an chah a ni.

He hunah hian District Level Cleanliness Week Celebration Committee Member Secretary Pi R. Lalnunkimi, DUDO Champhai, Dr. Lallawmkima, DIPRO Champhai leh Member dangte an tel a ni.

Ruahman dan chuan naktuk October ni 6 hian veng tinah aurinna hmangin bawlhhlawh thliarhran inzirtirna chungchang puan tum a ni a. October ni 7 ah hmun lun lai leh mipui tamna hmunahte bawlhhlawh thliarhran inzirtir nan tawihthei leh theilo thliarna bawlhhlawh bawm (Twin-bin) hun tum a ni a. Faina Hapta hman mek kharna hun chu October ni 8, 2022 zing dar 7 ah Kahrawt Field-ah District Bawrhsap hova neih a ni ang.