1600/2023-2024

Champhai the 22nd August, 2023 – Kan hma lawka lo thleng tur Teachers’ Day 2023 Champhai District-a hman dan tur relin vawiin khan Education Training Hall, Kahrawt Veng Champhaiah District Level Committee on Celebration of Teachers’ Day te chu an Chairman Champhai Bawrhsap Pu James Lalrinchhana hovin an thukhawm.

Champhai DC & Chairman District Level Committee on Celebration of Teachers’ Day Pu James Lalrinchhana chuan zirtirtute chu kan khawtlang tana mi pawimawh tak te an nih angin an puala Ni ‘Teachers’ Day’ chu Champhai District-ah hlawhtling taka hman anih theihnan member kalkhawmte an ngaihtuahna uluk taka seng turin a ngen a ni.

Committee chuan Teachers’ Day 2023 chu School tin ten an remchan dan angin Teachers’ Day lawmna chu mahni school theuhah hman leh ni se tih an rel a. Teachers Day 2023 pual hian Champhai khawpui chhung hmun pathum – Dawrkaikawn, Darthangvunga Traffic Point leh Bethel kawnah te a remchan dan angin photo booth dah tum a ni a. National leh State Teachers’ Awardee te chawimawi tur niin banner leh photo booth ah te tarlan ni se tih Committee chuan a rel a. Champhai District atangin National Awardee mi paruk (6) leh State Awardee panga (5) an awm tawh a ni.

Teachers Day 2023 pual hian Champhai DC & Chairman District Level Committee on Celebration of Teachers’ Day Pu James Lalrinchhana atangin Teachers Day 2023 Message neih ni se tih Committee chuan relin he Message hi Cable TV kaltlanga thehdarh anih dawn bakah School tinah Teachers Day lawmna program-ah chhiar chhuah ni se tih an rel bawk a ni.

National Foundation for Teachers’ Welfare Fund (NFTW) atan zirtirtuten cheng 100 theuh an thawh thin chu cheng 200 theuh ah kumin atangintih san niin, District Education Office hmalaknain Champhai District zirtirtute atangin khawn ni se tih Committee chuan an rel bawk a. NFTW Fund hi zirtirtu damlo kanna atana hman thin niin, State pawna inenkawl te Rs. 30,000/- State chhung (Natna khirh) te Rs. 20,000/- leh State Chhung (Natna Ziaawm) te Rs. 10,000/- a kan thin an ni.

Teachers Day puala zirlaiten zirtirtute thilpek an pek thin chungchang pawh ngaihtuah ho niin thilpek te a rualkhai zawka inpek anih theihnan school tinin hma lo la theuh se, mimal hnena thilpek tih loh hram ni se tih Committee chuan a rel bawk a ni.

Vawiin meeting-ah hian Department hrang hrang official-te, MISTA, MSTA, MPTA, CDATA, MEMSOT President-te, Sub Hqrs YMA Champhai, Sub Hqrs MHIP Champhai, Joint VC Champhai North leh South hruaitute, Pu K. Lalrintluanga leh MZP leh MSU hruaitute an tel a ni.