Vawiin khan DC Conference Hall, Keifangtlangah, Champhai District Level Committee on PMGDISHA chu an Chairman Pu Vanlalngaihsaka, IAS kaihhruaina hnuaiah an thukhawm.
Thutkhawm ah hian Pu Beitlotha Nohro, MCS, Nodal Officer PMGDISHA chuan Scheme chungchang sawizauna neiin, PMGDISHA chu India ram pum thingtlang hmun kilkhawra awm te tana internet, computer leh smart phone te hmang thiama (Digital Literacy) nitin nun alo zangkhai zawk theih nana inzirtirna tur Scheme a nih thu a sawi a. District chhung hmun hrang hrangah Training Centre dina Zirtirna pek tur a ni. Zir man a awm lova, zirna hi thingtlang/zokhua (Rural area) mi kum 14-60 inkar internet, computer leh smart phone kaihhnawiha thiamna neilo, chhungkaw 1 atangin mi 1 tan a ni. He Scheme hnuaia zir tur hian SC,ST,BPL, hmeithai, vohbik (rualbanlo), college drop out leh hetiang lama thiamna neilo zirlai naupang pawl 9-12 te chu duhsak bik an ni ang.
PMGDISHA in a tum ber chu Technology khawvela nitin nun alo awlsam zawk nan, eg: Smart phone leh internet kaltlanga tui, electric bill pek, pawisa inthawn, topup thun, thil lei (online payment) etc inzirtir a ni. Hetianga pawisa fai telloa mamawh chi hrang hrang lei/lakluh/bill pek etc (Cashless Transaction) thiamna hi chhungtin atangin member 1 talin an thiam chuan chhungkaw nun awlsam zawk nan kawngro a su thui dawn hle a ni. Sawrkar laipui chuan he scheme hnuaiah hian mihring vaibelchhe 6 (6 Crore) chu March 31, 2019 hma in zirtirna pek a tuma, Mizoramah chuan mihring 38000 hnenah pek tur niin, Champhai District ah chuan mihring 4500 hnena ziritrna hi pek tura duan a ni.
He thutkhawmah hian hemi scheme kaihnawiha Official hrang hrangte an thukhawma, he Scheme kalpui chhoh dan tur rel a ni a, Training Centre hawnna tur hmun hrang hrang ngaituah ani bawk. Hetih lai hian Scheme chungchanga thil hriatthiamloh ala awm avangin kalpui tan hmain uluk lehzuala zirchiang hmasa tura rel a ni.
