Vawiin khan Rajya Sabha MP Pu Ronald Sapa Tlau kaihhruaiin Lunglei DC Conference Hall-ah District Development Coordination and Monitoring Committee (DISHA) chu an thukhawm a. Lunglei District chhunga sawrkar laipui scheme te kalpui dan an thlirho. 

Chairman Pu Ronald Sapa Tlau chuan District tina department hrang hrang te hian kan ram hmasawnna hnuk in chelh a,  chuvangin thahnem ngai taka mahni hna theuh kan thawh hian kan ram hian hmasawnna a pan dawn a ni, a ti a. Mahni hnathawhna hmuna sulhnu tha tak hnutchhiah theuh thei turin theihtawp chhuah turin a chah a ni. Tlawmngaipawlte pawhin ram siam kawngah mawhphurhna pawimawh tak an nei a ni tiin, tha thlah hauh lova sawrkar hmalaknaa thlawp zel turin a chah bawk a ni. 

Meeting-ah hian kum 2016-17 chhung khan MGNREGS hnuaiah ni 32 inhlawhna siam niin, kum 2017-18 chhunga ni 52 inhlawhna tur Labour Budget pawh Empowered Committee-in a pawm thu tarlan a ni a. April 2017 thleng khan mi 34653 te’n Job Card an nei a ni. MGNREGS hnuaia heng hnathawhte hi Geo-Tagging kalpui mek a ni bawk. PMAY-G hnuaiah In 333 sak zawh tawh niin, PMKSY (WD) hnuaiah Project 15 zinga Project 3-te chu zawh fel tawh a ni. 

Kum 2016-17 chhung khan Lunglei District-ah nausen pianghlim thi 42 an awm a, Infant Mortality Rate (IMR) hi 1000 zela 18 nia chhut a ni. Hemi hun chhung hian nu nau chunga thihna 2 a thleng a ni. Thosilen damdawia chiah sa (LLIN) hman avanga malaria vei pawh an tlakhniam thu tarlan a ni. 

Swachh Bharat Mission Urban hnuaiah YMA kaltlangin mimal inthiarna, Individual Household Latrine (IHHL) 150 siam a nih thu tarlan a ni a. PMAY/ Housing for All (HFA)-Urban hnuaia Beneficiary Led Construction (BLC)-ah beneficiary turte thlan chhuah mai tura peih fel ni tawh mahse, Aadhar Card neih a tul avangin ruahman anga hma lak theih a nih loh thu tarlan a ni. 

R-APDRP leh REDP XII Plan Project hnuaia Project tam zawk te chu zawh fel a ni a, khaw 27-ah RGGVY leh khaw 4-ah DDUGJY kalpui mek a ni. Swachh Bharat Mission Gramin hnuaiah Lunglei District Block 4 chhungah IHHL-te siam niin, National Rural Drinking Water Programme (NRDWP) hnuaiah khaw 3 leh school 3 te tui in tur pek a ni. PMGSY hnuaiah kawng siam lai 5 awm in, kawng 1 siam zawh tawh niin, kawng pakhat zawh thuai theih tura beisei a ni. 

Midday Meal hnuaih Kitchen-cum-Store 30 sak mek a ni a. ICDS Project pakhat Block tinah kalpui mek niin,  Old Age Pension mi 5268 hnenah pek an ni. Aadhar Enrolment pawh chak taka kalpui a ni a, Lunglei District-ah mi 179742 an awm anga chhut niin, mi 115969 (64.51%) te’n enrolment an ti tawh a ni. 

Meeting ah hian Lunglei West bialtu MLA Pu Chalrosanga Ralte, department official-te bakah Village Council member leh tlawmngaipawl aiawh te an tel a ni.