2178/2022-2023

Champhai, the 4th October, 2022: Champhai District chhunga Fostering Climate Resilient Upland Farming System in the North-East (FOCUS) hmalakna hrang hrangte ngaihtuaha ruahmanna siamtu, District Level Coordination Committee (DLCC) on FOCUS member-te chuan vawiin chawhma dar 11 khan an Chairman Pu James Lalrinchhana, District Bawrhsap hovin DC Conference Hall-ah meeting an nei.

He hun kaihruaitu District Bawrhsap Pu James Lalrinchhana chuan State Level FOCUS Committee thukhawm hnuhnung ber neih chungchang report a pe a. IFAD chu kalphung felfai tak nei a nih thu leh hemi kaltlanga hmalakna pakhat FOCUS hnuaia hnathawhte chu uluk leh felfai taka kalpui a tul thu sawiin, hun bituk chhung ngeia tanlak a tul thu a sawi a. Line Department-te inkarah inpawhtlanna leh thawhhona tha neih a pawimawh thu a sawi bawk a. FOCUS kalpuitu Department hotute chu mipui tana thawktu an nih inhre thar a, hamthatna leh hmasawnna tam thei ang ber hun bituk chhung ngeia siam a nih theih nana  thahnemngai taka thawhhopuiah a sawm nghal bawk a ni.

He hunah hian kum 2021 atanga kalpui tan, FOCUS kaltlanga Horticulture Department hnuaia Grape chingtu chhungkua 75 te tana Area Expansion Scheme (AES) hmalakna chungchang leh, hemi hnuaia hmanrua leina tura thil man bituk rate quotation chungchangte sawiho a ni a. Uluk taka ngaihtuahho a nih hnuah item 4, Grape zamna (GI wire), a ban (angle iron bar), a rah lawhna bawm (plastic crate) leh a tang/zar chehbunna (prunning secateur) leina tura pawisa ruahman Rs.20,46,563 (cheng nuai sawmhnih singli sangruk zanga sawmruk leh pathum) chu rate dinglai pawm tur a awm mai loh avangin hmalak lehzel dan turah a ranglamin thuneitu sang zawkte berawn chunga kalpui nise tih a ni a. Lei ngai dang item 3, Hlo kahna (knapsack sprayer) leh leitha chi hnih, NPK leh Plant Protection Chemical-te lei nana ruahman Rs. 3,97,131 (cheng nuaithum singkua sangsarih za sawmthum leh pakhat) chu rate dinglai hman mek a awm avangin hmalak nghal mai nise tih a ni bawk.

He hunah hian FOCUS kaltlanga Support for Wetland Agriculture hnuaia hmalakna turte sawiho niin, thutkhawm hmasa lama hmalakna tura duan tawhte zirchian niin, siamthat ngaite siamrem a ni a. Zirchian ngaia hriatte enfiah nise tih a ni bawk a. Heng bakah hian lei tih thatna tura hmalakna Soil Fertility Management hnuaia chhungkua 60 te tana unit khat zela Rs.6,000 hmanga hmalakna tur chungchangte pawh sawiho a ni a. Loneitute leitha pek mai duh tawk lova, leitha siam leh intodelh thei tura thiamna tak tak pekte, nakin thlenga an chhawr tangkai theih dan tur tinzawna hmalak dan turte sawiho a ni a. FOCUS kaltlangin Leisenzo khuaa Alu chingtu mi 129 te tan nakum February-March velah Alu chi pek chhuah remtih a nih thu tarlan a ni bawk.

Vawiin District Level Coordination Committee (DLCC) on FOCUS thutkhawmah hian Line Department hrang hrangte kaltlanga hmalakna kalpui mekte ngaihthlak a ni a, report kimchangte thehlut turin Line Department hotute hriattir an ni bawk.

Vawiin thukhawmah hian Pu M.S Dawngliana, District Project Manager, FOCUS, DMU, Champhai; Line Department hrang hranga DLCC member-te leh FOCUS District Management Unit (DMU), Champhaia thawktute an tel a ni.