2177/2022-2023
Aizawl 4th October 2022: Bangalore-a Mizote Kutpui ‘Vangpui Kut’ a hmanpui zawh hnuin, Nimin, October Ni 3, 2022 (Thawhtanni) khan Agriculture, Irrigation leh Cooperation Minister Pu C. Lalrinsanga chuan Indian Council of Agriculture Research hnuaia Indian Institute of Horticultural Research (ICAR-IIHR) leh National Bureau of Agricultural Insect Resources (ICAR-NBAIR) hmunpui te chu tlawhin Bangalore-ah hun a hmang a. Scientist te hnenah Agriculture thiamna (Technology) hrang hranga Mizoram mamawh te a sawipui.

Indian Institute of Horticultural Research (ICAR-IIHR) a tlawhnaah hian Minister chu Director Dr. Debi Sharma chuan lo dawngsawngin Minister chuan Indian Institute of Horticulture Research (IIHR) in an siamchhuah Tomato Variety chi hnih Arka-Rakshak leh Arka-Samrat chu Mizoramin kan chin tak avanga lo neitute sum lakluh kawnga hmasawnna kan neih thu a thlen a, heng tomato varieties siamchhuah kawnga an hmalaknaah IIHR Director chu lawmthu a hrilh a ni. Minister chuan Tomato kan lo thar tam chhoh takah hian Value Addition nei tura hmabak kan neih dan te sawichhuakin, chumi atana IIHR in theihtawp min chhuahpui a tul thu a sawi a. IIHR Director chuan IIHR in Post-harvest technology chi hrang hrang an neih thu te leh incubation Centre tha tak an neih thu te lo hrilhin Agriculture lama Entreprenuer (Agro-preneurs)-te tana training an pek theih thu leh post harvest thiam hnang chi hrang hrang an hlanchhawn theih thuin a lo chhang a. Minister-in Mizoram mamawh a thlen ang hian heng lama tuimi Mizo thalaite chu puih a inhuam thu Minister hi a lo hrilh a ni.

Minister Pu C. Lalrinsanga chuan National Bureau of Agricultural Insect Resources (ICAR-NBAIR) pawh tlawh chhunzawmin Principal Scientist Dr Kesavan Subaharan nen Mizoram mamawh chi hrang hrang an sawi dun a. Minister chuan Mizoram sawrkarin Chemical hmang lova thlai eichhetu beihna (Bio Control Laboratory) chu Lengpui hmuna a buatsaih mek thu hrilh a. He laboratory tihchangtlun nan hian NBAIR Technology hrang hrang Mizoramin kan mamawh dan te Minister chuan a thlen a. NBAIR hotute pawhin Minister-in sawi te chu an ngaihpawimawh thu leh thlai eichhetu ven leh tihrem kawnga chemical hmang lo zawnga Mizoramin hma a la chu lawmawm a tih thu te sawiin thiamna (technology) inhlanchhawn kawnga theihtawp chhuahpui an inhuam thu an lo hrilh a. Hmalak tlan zel chu phurawm an tih thu an lo hrilh a ni.

Kum 2019-20 chhoa Mizorama Vaimim eichhetu Fall Army Worm rawn puang thutah khan NBAIR scientist te chuan Fall Army Worm beih kawnga an thiamna leh hriatna ril tak tak hmanga Mizoram chu an puih avangin Minister chuan lawmthu a hrilh bawk a. NBAIR hotute chuan tun tuma Minister-in a tlawh avang hian Chemical hmang lova rannung beihna (Bio Control agent) siam punna tur Trichograma Mother Culture an lo pe bawk a ni. Hei hi Lengpuia Bio- Control Laboratory-ah tih pun tura hmalak a ni ang.

Agriculture Minister hi Mizoram Sawrkar atangin Pu F. Lalmalsawma, Dy Director leh Dr. Samuel Lalliansanga, Dy Director, Agriculture Department ten an tawiawm a. Minister hian vawiin October Ni 4 hian Delhi lam panin Bangalore a chhuahsan ang.