2176/2022-2023
Aizawl, 4.10.2022: Vawiin chawhnu khan Chief Minister Pu Zoramthanga hovin Zokhawsanga Assam Rifles hmunpui hawnna inkhawm buatsaih dan tur Chief Minister office Conference Hall-ah ngaihtuah ho a ni.

Chief Minister chuan September thlaa New Delhi a kal tumin Union Home Minister chu Zokhawsang Assam Rifles hmun hawnsak turin a sawm a, ani pawhin a lo remti a. Hemi bawhzui hian vawiin khan hawnna inkhawm buatsaih dan tur rel a ni a. Assam Rifles hmun pawimawh ber te zing a mi a nih avangin a hawnna inkhawm pawh felfai taka kalpui ngei a nih theih nan ngaihtuah tur hrang hrang te an sawiho a. Hmalak ngai te bawhzui thuai a nih theih nan Inauguration Committee siam ni se tiin member turte ruat nghal a ni bawk.

Dy. Chief Minister Pu Tawnluia, Home Minister Pu Lalchamliana, Revenue and Settlement Minister Pu Lalruatkima te vawiin meeting ah hian telin, Assam Rifles hotute, Home Department, PWD, P&ED PHED, Aizawl DC hotute bakah Aizawl Smart City leh EPIL aiawhte an tel bawk.