4096/2024-2025

Champhai, 5th February 2025: Vawiin chawhnu dar 01:00 khan Champhai District Level Fire Prevention Committee chu Bawrhsap Pu VL Remliana kaihhruaiin DC Conference Hall, Keifangtlangah an ṭhukhawm a. Kangmei venna Hapta ‘Fire Prevention Week 2025’ hman dan tur leh tun ṭhal lo awm tura kangmei chhuak ven kawnga hmalak dan tur an sawiho a ni.

Champhai Bawrhsap Pu VL Remliana chuan he hunah hian kangmei venna kawngah dan leh thupek khauh taka kenkawh ṭul a tih thu sawiin, dan bawhchhiate chu an phu ang tawk hremna pek a ṭul, a ti a. Kangmei tichhuaktu te lakah khauh zawka hmalak a nih theih nan ruahmanna felfai tak siam a ṭul thu a sawi bawk a ni.

Vawiin ṭhutkhawm hian Kangmei Venna Hapta hawnna chu February ni 10, 2025 (Thawhṭanni) chhun dar 12:00 ah Conservator of Forest (Eastern Circle) Auditorium, Champhai Bethel Vengah hman ni se tiin an rel a. Kangmei Venna Hapta 2025 thupui atan hian ‘ Kangmei ven hi kan tu leh fate hmakhua atan a ni’ tih hman a ni ang. Ṭhutkhawm hian kangmei venna kawnga hma la ṭha veng/khua te hnenah chawimawina pek ni se, lawmman hi Green Mizoram Day-ah hlan ni se tiin an rel bawk.

Ram tikang lo tura hriattirna te, mei lam sial chungchang te, lo hal hun bituk leh silai lek chhuak lo tura hriattirna te chu Deputy Commissioner, DFO leh District Local Administration Officer ten an tichhuak dawn a. Social Media bakah Village Council leh tlawmngai pawl te kaltlangin kangmei tichhuak lo tura inzirtirna kalpui tum a ni bawk.

District Level Fire Prevention Committee hian kangmei tichhuaktu ten an phu tawk hremna an hmuh theih nan Member Secretary, DLFPC hmingin kangmei tichhuaktu te lakah FIR thehluh ṭhin ni se an ti a. Kangmei tichhuaktute hi Pu Lalbiakchama Chawngthu, DFO Ph.no - +91 8974419028 leh Pu Benjamin Zalawma Ralte, DLAO Ph.no +91 88266 08104 te hnenah thlen theih a ni a, report petu te hming hi thup tlat a ni ang.

Vawiin ṭhutkhawmah hian sawrkar department aiawhte bakah MJA, Sub Headquarters YMA leh MHIP aiawhte an tel a ni.