4097/2024-2025

Aizawl, the 5th February, 2025: Mizoram Cooperative Apex Bank Ltd. Executive Committee chu an Chairman Pu Lalnunsanga hovin vawiin khan Board Meeting Room, Head Office Tuikual-ah an thukhawm.

He hunah hian society hrang hrangte'n Apex Bank-a share lei an dilnate enfiaha pawm a ni a. Hetih rual hian mimal, pawl leh Kohhran hrang hrangin loan an dilna, avaiin Cheng nuai 3525.27 chu pek chhuah an remti bawk a ni.

Mimal loan dilna hi sumdawnna (Business), thlai chin, ranvulh leh loneih (Agri & Allied Agri), housing loan leh PMEGP te niin, avaiin Cheng nuai 2245.27 a ni a. Kohhran hrang hrang tana Biak In sakna loan-a sanction hi Cheng nuai 1280 a tling bawk.

Vawiin vek khan Aijal Club-ah Apex Bank hnuaia thawktu Clerk 27 leh Officer 3 lak tharte pualin ni 3 awh induction training programme neih a ni a. Pi Pankaja Borah, General Manager, NABARD, Mizoram Regional Office chuan he hun hi hmanpuiin Mizoram hmasawnna tur atana taima leh rinawm taka thawk turin thawktu lak tharte a fuih a ni.

Tun dinhmunah Apex Bank hian Deposit cheng vaibelchhia 1573 an dawn atangin Loan cheng vaibelchhia 1199 an pe chhuak a, hei hi CD Ratio tehfung 76% a ni.