Vawiin chawhma dar 11 khan Champhai District Fire Prevention Committee chu Addl DC Pu Mark Lalthanliana hovin an thukhawm a, February Ni 10-15 2020 chhunga Kangmei Ven Hapta hman dan tur leh kumin thal chhova Champhai district chhunga kangmei a chhuah lohna tura hmalak dan tur hrang hrangte rel a ni. Kumin Kangmei ven hapta thupui tur chu ‘Kangmei chhuak tur veng la, I ram chhan rawh’ tih a ni.

Pu Mark Lalthanliana chuan kumin atana Fire Prevention Committee thukhawm hmasa bera kalkhawm zawng zawngte hnenah lawmthu sawiin, khua a lo thal leh tan tawh avangin kangmei chhuak tur lakah kan fimkhur hle a ngai tawh a ni, a ti a. Champhai district mipuite chu nikuma kangmei veng tha ber dsitrict nihna hrerenga nikum aia tang leh zuala beihpui thlaka kangmei ti chhuaklo tura fimkhur turin a chah a, thupek zawm lova ram tikangte chungah dan ang taka hremna lekkawh anih tur thu a sawi a. Champhai District mipuite chu kangmei ti chhuak lo tur leh kangmei ven leh thelh kawnga neitu nihna thinlung pu chunga thahnem ngai taka thawk turin a ngen nghal a ni.

Thukhawm chuan Kangmei Ven Hapta hawnna chu February Ni 10, 2020 (Thawhtanni) hian hman nise, a hmunhma leh hun hman dan tur kimchang chu Nodal Department Environment, Forest & Climate Change kutah a dah a. He hapta hi mipui huapzo thei ang bera hman nise, kangmei laka fimkhur tura zirtirna, kangmei ven tangkaina leh kangmei thelh kawnga hriat tur pawimawhte leh tulte a zau thei ang bera mipuite thlengpha ngei tura chhawpchhuah nise a ti a. Nodal Department Environment Forest and Climate Change in mipuite hnena hriat tur pawimawh leh tangkaite duang chhuakin zau thei ang bera inzirtirna neih ni se, YMA Information Centre leh VC aurinna hmangte a kangmei hluar hun laiin mipuite zirtirna lam hawia thuchhuah siam, Zirlai naupangte hnenah kangmei ven kawnga zirtirna pek leh Kohhran lamte pawh hemi kawnga hriat tur leh hmalakna te puangzar tura ngen nise tih a ni a. Village Fire Prevention Committee din nise a ruangam leh hmalak dan tur kimchang pawh siam nise, kangmei laka venhim ngai bik hmunhmate ngun taka vil nise tih a ni a. Khua leh Veng tinahte kangmei ven kawnga inzirtirna awareness campaign Gram Sabha kaltlanga neih nise, kangmei ven kawnga inzirtirna ennawm Animation hmanga siam nise tih leh Huan, Leipui leh Lo hal tur ten sawrkarin dan a siam zulzuiin mei kawng sial theuh nise, Kawngpui vat chhuak lo tur leh Lo hal hun March Ni 15 aia tlai lova hal hman vek tura hriattir nise ti a rel a ni bawk.

Meeting chuan District Magistrate hnen atangin VC tinte hnenah kangmei ven kawnga tihtur leh zawm turte khauh taka hriattirna pek nise, dan pawisa lo chungah na taka hremna lek kawh anih dawn thu a tarlan ni se a ti a, DLAO kaltlangin District chhunga VC tinte hnenah kangmei ven kawnga hriat tur leh zawm turte hriattirna lehkha siam nawn leh nise tih a ni a. Heng bakah hian kangmei ven kawnga inzirtirna Daily Newspaper leh TV kaltlanga pekchhuah thin nise tih leh kangmei ven kawnga khua leh Chanchinbu thawk thate lawmman pek leh nise ti a rel a ni bawk.

Pu Lalduhthlana, DFO Champhai, Member Secretary, Champhai District Level Fire Prevention Committee chuan nikum lama kangmei ven hapta chhunga hmalaknate a sawi a, kumin atana hmalak ngaihna leh rawtna awm theite tarlangin a sawifiah a ni. ISFR-2019 report, December 2017 atanga February 2018 chhunga Satellite data hmanga zirchian danin, Mizorama Forest Cover zat chu 85.41% a ni a, kum hnih kalta 2017-2019 chhung khan Forest Cover area chu Sq kilometre 180.49 in a kiam a, heng zinga Sq kilometre 115.21 a zau chu Champhai District chhunga mi niin, State chhunga a kiamna za zela 64 lai a ni. Mizoram pumah kum 2017 a Forest Cover zat chu 86.26 % anih laiin kum 2019 ah chuan 85.41% niin, Forest Cover kiamna hi za zela 0.85 a ni.

Vawiin meeting-ah hian District Level Committee on Fire Prevention member-te an tel a ni.