3391/2022-2023

Champhai, the 27th January, 2023: District Level Narco Coordination Centre (NCORD) Committee, Champhai District thutkhawm vawi 5-na leh kumin atana thutkhawm hmasa ber chu vawiin chawhma dar 11 khan an Chairperson Pu James Lalrinchhana, District Bawrhsap hovin DC Conference Hall-ah neih a ni.

Pu James Lalrinchhana chuan ram leh hnam run mektu ruihhlo do kawnga official, NGO, media, kohhran leh khawtlang mipuite inkara thawhhona tha tak Champhai District-a awm chu fakawm a tih thu leh chhawmnun zel a pawimawh thu a sawi a. Ruihhlo tam tham taka mante chu Mizoram mai nilo ram chhung hmun dangte thlenga tawlh tura ruahman anih theih thu sawiin, helaia theihtawp kan lo chhuah hi India ram hmun dangte himna tur pawh a ni tel vek a, ramri depa awm gate vengtu kan nih avangin Mizoram mai ni lo India ram pum him nan tha thlah lova tanlak zel kan tum tur a ni, a ti a. Kalkhawmte chu tha thlah mai lova tanrualna nen ruihhlo do kawngah tun aia nasa zawka tang tur leh, mawhphurhna sang tak an neihte ram leh hnam tan a ni tih hriaa theihtawp chhuaha hlen chhuah tum zel turin a sawm nghal bawk.

Vawiin thutkhawmah hian meeting hmasa December ni 15, 2022 a neih thurel bawhzui dan tlangpuite ngaihthlak a ni a. Ruihhlo avanga mante chak zawka ND&PS Act hnuaia hremna pek an nih theih nan hriatpuitu tha leh a chinchang hria tam zawk neih a tul thu sawiho niin, hmalak tulte ngaihthlak a ni a. Ram leh hnam ei chhe mektu ruihhlo do kawngah pheikhai rual taka kal a, felhlel awm lova thil tisualtu dan hnuaia hremna pek an nih zel theih nana hmasawn ngaihna laite sawiho a ni a. Narcotics Control Bureau (NCB) Office, Champhaia bunna tur hmunhma chungchangte pawh sawiho niin remchang hmasa berah enfiah nise tih a ni a, ruihhlo hmangsual lo tura inzirtirna Nasha Mukh Bharat Abhiyaan leh Line Department-te nena tangkawpa zau zawka kalpui dan turte pawh sawiho a ni bawk.

He hunah hian Champhai District Police leh Excise & Narcotics Department Champhaite hmalakna kaltlanga nikum leh kumin chhunga ruihhlo man zat leh Narcotic Drugs and Psychotropic Substances Act (ND&PS Act), 1985 hnuaia case ziahluh dan tlangpui Addl. SP Pu C.Lalengliana leh Asst. Commissioner of Excise & Narcotics Pu Vanlalvura Ralte te hnen atangin ngaihthlak a ni.

He huna tarlan anih dan chuan nikum 2022 chhung khan Champhai District Police-ten ND&PS Act, 1985 hnuaiah case 89 an ziaklut a, mi 118 man niin heng zinga 29 te hi ramdang mi an ni. Heroin hawng 2,137 (gram 27,800) man niin, Department chhut dana tualchhung market-a a hlut zawng cheng nuai 641.10 a ni a. Methamphetamine mum 8,20,400 (kg 85.11), a hlut zawng cheng nuai 1640.80 man hu, Crystal Methamphetamine kg 20, cheng nuai 100 hu bakah Pseudoephedrine mum 1,80,000 (kg 28.80), cheng nuai 126 hu an man bawk. Ruihhlo man zawng zawng hlut zawng hi cheng nuai 2507.90 a ni.

Kum 2022 chhung khan Excise & Narcotics Department Champhai te'n ND&PS Act, 1985 hnuaiah case 88 ziaklutin mi 108 an man a, heng zinga mi 19 te hi ramdang mi an ni. Heroin kg 10.27, tualchhung rate-a cheng nuai 123.07 man, Methamphetamine mum 3,93,700 (kg 52.61), cheng nuai 1181.10 man, Pseudoephedrine mum 8,896 (kg 1.24), cheng 53,376 man, Ganja kg 2.7, cheng 6,750 man leh Alprazolam mum 1,298 (gram 140.65), cheng 12,980 hu an man bawk a. An man zawng zawng hlut zawng hi cheng nuai 1304.90 vel a ni.

Kumin bika ruihhlo man tarlan anih danin January ni 1,2023 atanga vawiin January ni 27, 2023 thlengin Champhai District Police-ten ND&PS Act, 1985 hnuaiah case 6 an ziaklut a, hemi kaihhnawihah hian mi 10 man niin heng zinga 3 te hi ramdang mi an ni. Heroin hawng 23 (gram 285.96) man niin, Department lam chhut danin tualchhung market-a a hlut zawng Rs 6,90,000/- a ni a, hawng 7 mante hi Assam Rifles nena joint operation kaltlanga man a ni. Ganja kg 6.35, a hlut zawng Rs 9,525 man hu Assam Rifles nena tangkawpa man a ni bawk a. Ruihhlo man zawng zawng hlut zawng hi Rs 6,99,525/- a ni.

Kumin chhung vek hian Excise & Narcotics Department Champhai te'n ND&PS Act, 1985 hnuaiah case 7 ziaklutin hemi kaihhnawihah hian mi 11 an man a, heng zinga mi 2 te hi ramdang mi an ni. Heroin hawng 74 (gram 895), Department lam chhut danin tualchhung rate-a Rs 1,79,000/- hu an man a; heng zinga hawng 70 te hi Assam Rifles nena joint operation kaltlanga man a ni.

Kumin atana NCORD thutkhawm hmasa berah hian Convener Pu Lalrinpuia Varte, SP Champhai leh member dangte an tel a ni.

NCORD hi kum 2016 ah din a ni a, 2019 ah siam that niin tunhnaiah chak lehzuala hmalak a ni a. May ni 10, 2022 ah District Level NCORD Committee member-te State Sawrkarin a siam fel a; hmalaknate Narcotics Control Bureau (NCB) lamah report zel thin a ni.