1217/2023-2024

Champhai, the 21st July, 2023: District Level Narco Coordination Centre (NCORD) Committee, Champhai District thutkhawm vawi 10-na leh kumin atana thutkhawm vawi 6-na chu vawiin chawhma dar 11 khan an Chairperson Pu James Lalrinchhana, District Bawrhsap hovin DC Conference Hall-ah neih a ni.

District Bawrhsap Pu James Lalrinchhana chuan ruihhlo leh a kaihhnawihin nghawng tha lo tak tak a thlen thu tarlangin, a tuartu vek kan ni a, tumah ruihhlo do kawngah kan ralbang bik thei lo a ni, a ti. Ruihhlo do kawngah Line Department hrang hrangte, YMA, NCORD, NMBA leh District Level Task Force on Ruihhlo Do te tha thlah lova tanrual zel a pawimawh thu a sawi a. Kalkhawmte chu a remchanna hun apiangah ruihhlo do kawnga pawimawhte puang chhuak tam turin a fuih a. Ramri depa awm Champhai District-ah ruihhlo do hmalaknate tawpsan mai theih a nih loh thu a sawi bawk.

Vawiin thutkhawmah hian meeting hmasa June ni 23, 2023 a neih thurel bawhzui dan tlangpuite NCORD Convener Pu Lalrinpuia Varte, SP Champhai hnen atangin ngaihthlak a ni a. Kumin kum bul atanga July ni 16, 2023 thlengin ND&PS case kaihhnawihah mi 73 man an nih tawh thu leh heng zinga 63 te chu mipa niin adang 10 te hmeichhia an nih thu a sawi a. Man zinga 53 te chu Mizorama chengte niin, ramdang mi 10 leh State dang mi 10 an awm thu a sawi bawk.

He hunah hian Champhai District Police, Excise & Narcotics Department Champhai leh Assam Rifles-te hmalakna kaltlanga ruihhlo man zat leh Narcotic Drugs and Psychotropic Substances Act (ND&PS Act), 1985 hnuaia case ziahluh dan tlangpuite Addl. SP Pu Lalmalsawma Hnamte, Asst. Commissioner of Excise & Narcotics Pu Vanlalvura Ralte leh Maj Seemant Singh, Assam Rifles OC Champhaite hnen atanga ngaihthlak a ni.

He huna tarlan a nih dan chuan June ni 22, 2023 atanga July ni 21, 2023 thleng khan Champhai District Police te'n ND&PS Act, 1985 hnuaiah case 15 an ziaklut a, hemi kaihhnawihah hian mi 24 man niin heng zinga 2 te hi ramdang mi an ni. Heroin gram 5006, Department lam chhut danin tualchhung market-a a hlut zawng Rs. 1,12,08,000/- leh Methamphetamine mum 2,02,000 (Kg 22.641), tualchhung rate-a cheng 40,400,000/- hu an man a ni.

Hemi hun chhung vek hian Excise & Narcotics Department Champhai te'n ND&PS Act, 1985 hnuaiah case 12 ziaklutin hemi kaihhnawihah hian mi 12 an man a, ramdang mi an tel lo a ni. Heroin gram 516, Department lam chhut dana tualchhung rate-a Rs 6,18,648/- hu an man bakah ruihhlo phurhna lirthei 3 (LMV 1 leh Two Wheeler 2) an man tel bawk. Heng bakah hian hemi hun chhung vek hian Assam Rifles COB Champhai leh Zokhawtharin operation tum 6 neiin heroin gram 409.42 leh Methamphetamine mum 20,000 an man bawk.

Thutkhawma tarlan a nih danin Line Department hrang hrangte kaltlangin Anti Drugs Awareness Campaign a remchan dan ang zela neih thin a ni a. Vantlang hmun langsar laiahte ruihhlo dona banner leh poster-te tar chhuah a ni a. Sawrkar laipui Ministry of Finance, Department of Revenue hnuaia Competent Authority & Administrator, Smugglers and Foreign Exchange Manipulators (Forfeiture of Property) Act, 1976 & Narcotic Drugs & Psychotropic Substances Act, 1985, Kolkata a inbun kaltlangin ruihhlo tawlh mante Jail bang zut leh pawisa chawi tir mai bakah an bank account hrensakte, an in leh lo thlenga man sak theihna Dan kalpui a nih thute tarlan a ni a. Hemi kaihhnawihah hian ND&PS Dan-in a sawi angin ruihhlo tawlhruk lianthama inhnamhnawihte lakah financial investigation Champhai District-ah pawh kalpui tan a nih tawh thu meeting-ah hian tarlan a ni a. ND&PS case a mante'n an phu tawk hremna an hmuh ngei theih nana tanrual a pawimawh thu leh hriatpuitu (witness) neih that a tul thute sawiho a ni bawk.

NCORD hi kum 2016 ah din niin, kum 2019 ah khan siam that niin tunhnaiah chak lehzuala hmalak a ni a. May ni 10, 2022 ah District Level NCORD Committee member-te State Sawrkarin a siam fel a; hmalaknate Narcotics Control Bureau (NCB) lamah report zel thin a ni.