397/2024-2025

Champhai, the 2nd May, 2024: District Level Narco Coordination Centre (NCORD) Committee, Champhai District meeting chu vawiin chhun dar 12:00 khan an Chairperson Pu James Lalrinchhana, District Bawrhsap hovin DC Conference Hall-ah neih a ni.

District Bawrhsap Pu James Lalrinchhana chuan thla tina NCORD meeting neih thin chu inthlan kaihhnawih avanga khaihlak hlek a nih hnu tarlangin, kokim taka neih chhunzawm leh a ni chu lawmawm a tih thu a sawi a. Enforcement Agency-te'n theihtawp chhuaha ruihhlo leh a kaihhnawih hrang hrangte do leh ven kawnga hma an la thin chu fakawm a tih thu sawiin, thawhhona tha tak hnuaia hmalakna chu tha thlah lova chhunzawm zel a tul a ni, a ti a. Ramri dep leh dai do a awm, Champhai District-a ruihhlo leh a kaihhnawih do kawnga lungrual taka hmalakna kalpui thin chu Mizoram tan mai nilo, India ram pum tana hmalakna a nih avangin kan ngaihthah thiang lo a ni, a ti a. Enforcement Agency duty-te chu ramri kaltlanga lakluh hman khat daih polythene bag (Single Use Plastic) te man zel turin a chah nghal bawk.

Thusawitu dang SP Champhai Pu Vineet Kumar chuan tunhnaia ruihhlo leh a kaihhnawih bakah dan lova thil tih man kawnga NCORD member hrang hrangte hmalakna fakawm tiin, a bik takin inthlan hun chhunga hmalaknate chhuanawm a tih thu a sawi a. Enforcement Agency, a bik takin Assam Rifles-te chu Special Operation an neih reng rengin inbiakpawhna leh tul danga harsatna an tawh loh nan Police-te hrilhhre zel turin a chah a. Ruihhlo leh a kaihhnawih laka hmalakna chak zawka kalpui a tul thu leh awareness campaign chak zawk neih a pawimawh thu a sawi bawk.

He hunah hian kumin February atanga April thla thlenga Champhai District Police, Excise & Narcotics Department Champhai, Assam Rifles leh Customs Preventive Force hmalakna kaltlanga ruihhlo man zat leh Narcotic Drugs and Psychotropic Substances Act (ND&PS Act), 1985 hnuaia case ziahluh dan tlangpuite ngaihthlak a ni.

He huna tarlan a nih dan chuan February, 2024 atanga April, 2024 thleng khan Champhai District Police te'n ND&PS Act, 1985 hnuaiah case 53 an ziaklut a, hemi kaihhnawihah hian mi 66 man niin heng zinga 11 te hi ramdang mi an ni. Heroin Kg 20.676, Department lam chhut danin tualchhung market-a a hlut zawng Rs. 6,20,28,630/-, Crystal Methamphetamine Kg 10.385, Rs. 31,15,50,000/- man hu leh Methamphetamine Kg 31.661, Rs 4,01,97,300/- man hu bakah Ganja Kg 22.5, Rs 25,000/- hu an man a ni.

Hemi hun chhung vek hian Excise & Narcotics Department Champhai te'n ND&PS Act, 1985 hnuaiah case 13 ziaklutin hemi kaihhnawihah hian mi 14 an man a, heng zinga 6 te hi ramdang mi an ni. Ruihhlo tawlh nana hman Two Wheeler 1 leh LMV 3 an man tel bawk a. Heroin Kg 3.2, Department lam chhut dana tualchhung rate-a Rs 96,00,000/- hu an man bakah Methamphetamine Kg 61.327, Rs 7,97,25,100/- hu an man bawk a. Heng bakah hian hemi hun chhung vek hian Assam Rifles COB Champhai leh Zokhawtharin heroin Kg 19.879 leh Methamphetamine Kg 41.318 an man a, Customs Preventive Force-in heroine gram 1,300 an man bawk.

Thutkhawma tarlan a nih danin Line Department hrang hrangte kaltlangin Anti Drugs Awareness Campaign a remchan dan ang zela neih thin a ni a. Thukhawm chuan tun thla chhunga Joint Operation neih tha a ti a. NCORD Committee chuan YMA te'n tlawmngaia enforcement agency-te an tawiawm thin chu fakawm a ti a. Ram leh hnam tan a ni tih hriaa tlawmngaia dan leh thupek kengkawhtute tawiawmna zel turin a sawm a. Awareness campaign neih tawh dante sawiho niin, ruihhlo man bakah hemi kawnga fihlim tura inzirtirna chu thahnemngai taka chhunzawm zel ni se tih a ni a.

NCORD hi kum 2016 ah din niin, May ni 10, 2022 ah District Level NCORD Committee member-te State Sawrkarin a siam fel a; hemi kaltlang hian Champhai District-ah chak taka hmalak niin, rokhawlhna a awmte nih loh chuan thla tin meeting neih thin a ni a, hmalaknate hi Narcotics Control Bureau (NCB) lamah report zel thin a ni.