398/2024-2025

Hnahthial the 2nd May 2024: Lok Sabha MP Inthlanpui 2024 a Vote tla a tam theih nana Systematic Voters’ Education & Electoral Participation (SVEEP) team, District Election Office, Hnahthial in South Tuipui bial Booth Level Officer (BLO) te puala a buatsaih vote tlak that berna PS (Best voter turnout) leh kum 2019 Lok Sabha inthlan vote tla atanga kumin inthlana vote tla pun tam berna PS (Best increase in voter turnout % in comparison to 2019 MP election) a titha te lawmman semna hun chu vawiin khan DC Meeting Hall, Rallangtlang, Hnahthial-ah neih a ni a, District Election Officer Pu Chuauhnuna chuan he hun hi a kaihruai a ni.

District Bawrhsap Pu Chuauhnuna chuan South Tuipui Biala Lok Sabha MP inthlanpui tluang taka neih zawh a ni ta chu a taka thawktute thawhrimna zar a ni tiin lawmawm a tih thu a sawi a, MP Inthlanah Mizoram pum ang zawngin vote a tla tha ngai lo a, South Tuipui bialah pawh thawktuten theihtawp an chhuah chungin kumin inthlanah State average aia a tlem thu tarlangin pawi a tih thu a sawi a, Mizoram mipuite inthlan ngaihpawimawh kawngah theihtawp chhuah a tul takzet a ni, a ti bawk. District Election Officer chuan vawiina lawmman dawngte chu a lawmpui thu sawiin duhsakna a hlan bawk a ni.

Pu Lalbiakfela, Election Officer chuan result puanna neiin Deputy Commissioner Pu Chuauhnuna leh Addl DC Pu Zothanmawia Khiangte ten lawmman semna an nei a, SVEEP Nodal Officer, DIPRO ni bawk Pi K Ngosai chuan kumin inthlanpuia South Tuipui biala vote tlak dan report tawi pein vote nei mi 16223 awmah vote 9088 a tlak thu sawiin za zelah 56.02 a nih thu a tarlang. SDC Pu R Vanlalruata chuan lawmthu sawina neiin mipui rorelna tihchakna kawngah vawiin kalkhawmte chu theihtawp chhuah pui zel turin a sawm bawk.

BLO kalkhawmte chuan an khua theuha an hmalak dan tlangpui sawina an nei bawk a, voter slip an semchhuah chuan vote thlak tur te tan awlsamna nasa tak a thlen thu an sawi a, vote tla a that theih nan in tina campaign an neih thin thu te, au rinna nen mitin vote thlak theuh tura an sawm thin thu te tarlangin theihtawp chhuah chhunzawm zel an tum thu an tarlang bawk.

SVEEP puala intihsiakna hi category 2 a then niin lawmman dawngtute chu :

Best voter turn-out:
1) Lungpuitlang BLO, Pu VL Roluahpuia Hauhulh =88.24%
2) New Kawnpui BLO, Pu H Lalhlimpuia =85.71%
3) Denlung BLO, Pu F Vanlalruata- 83.02%

Best increase in voter turnout:
1) Lungpuitlang BLO, Pu VL Rohluahluia Hauhulh; Lungpuitlang PS ah hian kum 2019 inthlanah 83.69 % vote tla in kumin ah 88.24 a tla a, 4.55 in a pung a ni.

2) Tarpho BLO, Pu C Rohmingliana; Tarpho PS ah hian kum 2019 inthlanah 74.48 % vote tla in kumin inthlanah 77.11% a tla a, 2.63 in a pung.

3) Muallianpui BLO, Pu LS Lalzuitluanga ; Muallianpui PS ah hian kum 2019 inthlanah 62.69 % vote tla in kumin inthlahah 63.58% vote a tla a, 1.75 in a pung bawk.

Vawiina pakhatna dinhmun hauhtute hian pawisa fai cheng 5,000/- theuh an dawng a, pahnihna te hian pawisa fai cheng 4,000/- theuh dawngin pathumna dinhmun hauhtute hian pawisa fai cheng 3,000/- theuh an dawng a, pawisa fai bakah citation mawi tak an dawng theuh bawk a ni. District Bawrhsap Pu Chuauhnuna bakah, Election Officer Pu Lalbiakfela, SDC Pu R Vanlalruata leh BLO supervisors te leh chanchinthar lakhawmtute an tel bawk a ni.