2625/2025-2026

Champhai, dated 11th December 2025: District Level Narco Coordination Centre (NCORD) Committee chuan vawiin khan Addl. DC Pu James Lalnithanga hovin DC Conference Hall-ah meeting an nei.

Chairman chuan thla tina NCORD meeting neih thin a ni chu lawmawm a tih thu a sawi a. Enforcement Agency-te’n theihtawp chhuaha ruihhlo leh a kaihhnawih hrang hrangte do leh ven kawnga hma an la thin chu fakawm a tih thu sawiin, thawhhona tha tak hnuaia hmalakna chu tha thlah lova chhunzawm zel a tul a ni, a ti a. Ramri dep leh dai do a awm, Champhai District-a ruihhlo leh a kaihhnawih do kawnga lungrual taka hmalakna kalpui thin chu Mizoram tan mai nilo, India ram pum tana hmalakna a nih avangin kan ngaihthah thiang lo tih a sawi.

Champhai SP Pu Lokeshwaran R chuan tunhnaia ruihhlo leh a kaihhnawih bakah dan lova thil tih man kawnga NCORD member hrang hrangte hmalakna fakawm tiin, Ruihhlo leh a kaihhnawih laka hmalakna chak zawka kalpui a tul thu leh awareness campaign chak zawk neih a pawimawh thu a sawi bawk.

He hunah hian kumin November thla chhunga Champhai District Police, Excise & Narcotics Department Champhai, Assam Rifles te hmalakna kaltlanga ruihhlo man zat leh Narcotic Drugs and Psychotropic Substances Act (ND&PS Act), 1985 hnuaia case ziahluh dan tlangpuite leh District Social Welfare te hmalakna te ngaihthlak a ni.

He huna tarlan a nih dan chuan November, 2025 chhung khan Champhai District Police te’n ND&PS Act, 1985 hnuaiah case 9 an ziaklut a, hemi kaihhnawihah hian mi 13 leh Two wheeler pakhat man niin Heroin gram 0.933, Department lam chhut danin tualchhung market-a a hlut zawng ₹18,660,000/- man hu a ni.

Hemi hun chhung vek hian Excise & Narcotics Department Champhai te’n ND&PS Act, 1985 hnuaiah case 5 ziaklutin hemi kaihhnawihah hian mi 8 manin Heroin gram 11.5 leh Methamphetamine Kg 25.209 an man bawk a ni. Excise & Narcotics Department Champhai hian November ni 22, 2025 khan Drugs Awareness Campaign Baptist Church Zokhawtharah an nei a mi 220 an tel a ni. Heng bakah hian Assam Rifles chuan October atanga December thla chhungin in ramdang atanga Dan lova lakluh Kuhva bag 1778, Cigarette case 149, Heroin hawng 8 leh Metamphetamine mum 50,500 an man a ni.

NCORD Committee chuan YMA te’n tlawmngaia enforcement agency-te an tawiawm thin chu fakawm a ti a. Ram leh hnam tan a ni tih hriaa tlawmngaia dan leh thupek kengkawhtute tawiawmna zel turin a sawm a. Awareness campaign neih tawh dante sawiho niin, ruihhlo man bakah hemi kawnga fihlim tura inzirtirna chu thahnemngai taka chhunzawm zel ni se ti a ni.