No.4681/2020-2021

Dated Champhai, the 2nd September, 2020: Ruihhlo leh a kaihhnawih hrang hrang laka India ram a fihlim theihna tura sawrkar laipuia Ministry of Social Justice & Empowerment leh Mizoram Social Defence & Rehabilitation Board-te tangkawp hmalakna 'Nasha Mukh Bharat Campaign’ kalpui dan tur chungchang relin vawiin khan Champhai DC Conference Hall-ah Pu Mark Lalthanliana, Addl DC hovin meeting neih a ni.

Pu Mark Lalthanliana chuan ruihhlo ngawlveite chu ngaipawimawha anmahni chhanchhuak tura theihtawp chhuah tlan a tul thu leh a la ti ve ngailote hnena zirtirna zau zawk kalpui zel a tul thu sawiin, ruihhlo do rualin ruihhlo leh kaihhnawih tih avanga natna inkaidarh theihte thleng pawha kan ven tel angai takzet a ni, a ti a. Ualau taka naupangte hmuh theih tura ruihhlo khawih leh tihlan chu ngaihmawhawm a tih thu sawiin, hemi kawngah tanlak puiah mipuite a sawm a. Ruihhlo ngaite enkawltu Doctor leh mithiamte chu theihtawp chhuaha tan la zel tura fuihin, ruihhlo do kawnga hmalaknate chu avaiin hlawhtling vek thei lo mahse mi pakhat talin damna tluantling a chan theih chuan hlawhtlinna tho a ni, a ti a. Pu Mark Lalthanliana chuan Covid-19 vanga hmalak zung zung a harsat rih thu pawh sawiin, Nasha Mukh Bharat Campaign hmachhawpte chu tha taka hlenchhuah ngei anih theihna turin a tul ang zela insiamrem ani ang, a a ti a. Member-te chu tha zawk ni a an hriatte inthlahrung lova sawi thin tur leh kalphung tha zawk a awm theihna tura ngaihtuahna seng thin turin a chah a, tha thlah hauh lova Champhai district hmasawnna kawnga theihtawp chhuah theuh turin a fuih nghal a ni.

Nasha Mukh Bharat Campaign hmang hian kum 2020-2021 chhung hian India rama District 272 ah te ruihhlo do hmalakna kalpui tum niin, Aizawl, Kolasib leh Champhai district-te chu Mizoram atanga he campaign kalpuina tura district thlante an ni a, Narcotics Bureau leh Ministry of Social Justice & Empowerment kaltlanga National Survey neihin drugs hluarna ni a a hriat district zulzuia thlante an ni. He Campaign hi Champhai district-ah September 2020 atanga March 2021 chhunga kalpui tura ruahman chhin niin, Action Plan duan leh senso turte, hemi hun chhunga hmalak theih dan tur hrang hrangte vawiin hian sawiho a ni.

Thukhawm chuan Nasha Mukh Bharat Campaign kaltlangin damdawi ruih hmang leh zu ngawlveite dapchhuaka an ngawlveina ata chhanchhuak tura beih nise, mipui vantlang abik takin Zirlai naupangte hnena ruihhlo thatlohna chungchang zirtirna resource person mithiam tak takte kaltlanga pek leh ruihhlo hluar lutuk tih tlem kawnga chak zawk hmalak nise tiin a rel a. Campaign kaltlang hian Service provider leh peer volunteer-te training peka zau zawka zirtirna documentary, Social media, Electronic media leh hmanraw dangte hmanga kalpui tura tanlak nise, district chhunga ruihhlo ngaite enkawlna hmun counselling centre, rehabilitation centre leh enkawlna Hospitala hmalak dante enfiah thin leh veng/khaw tin atanga peer volunteer thlanchhuahte kaltlangin zau zawka vantlang zirtirna kawnga hmalak nise tiin a rel a. Champhai district chhunga zirna In a bikin High School, Higher Secondary School leh College-ah te ruihhlo thatlohna zirtirna campaign kalpuia, debate, Quiz leh Poster campaign-te neiha Nasha Mukh Club-te din tura hmalak ni se tih a ni a. Tobacco/Cigarette zawrh khap kawngah Police, Legal Metrology leh Anti-Tobacco Squad-te hmanga ngawrh taka hmalak nise tih a ni bawk a. Meeting chuan tul biakh programme duan lawkte chu Covid-19 vanga rokhawlhna a awm anih pawhin siam rem leh mai nise, a tul ang zelin meeting neiha inrawnkhawmna neih leh nise a ti bawk.

Vawiin Meeting-ah hian Pu Rex Zarzoliana Vanchhawng SP, Pi Lalrochami Ralte CJM, Line department hotute leh NGO aiawhte an tel a ni.