Vawiin khan Champhai DC Conference Hall-ah Special Summary Revision of Electoral Rolls-2019 neih dan tur ngaihtuahin District Level Standing Committee chu Addl DC Pu Alexander V. Chongthu kaihhruainain an thukhawm.

Pu Alexander V. Chongthu chuan Electoral Roll chu khua leh tui nihna dik tak tichiangtu ani a, dik leh felfai taka buatsaih anih theihna turin a khat tawkin hun bi nei zela siam that thin a ni, a ti a. January Ni 1,2020 qualifying date-a hmanga Special Summary Revision neih leh turah dik taka kalpui anih theihnan ruahmanna kalpui mek zel anih thu sawiin, hun tiam chhung ngeia zawh hman anih theihna turin thawhhona tha tak awm angaih thu a sawi a. Sawmna ngaipawimawha kalkhawmte chungah lawmthu a sawi a ni.

Pu Lalnunfela Chawngthu Election Officer Champahai pawhin thusawiin, Special Summary Roll Revision neih a lo hun leh tak a vangin roll a lut leh siamthat tur awmahte a hma thei anga bawhzui zel a tul thu sawiin, dilna siamtute chu a hun taka peihfel aniha Office lama bawhzui vat  anih theihna tura khawtlai lo turin a chah a. ECI  ruahmanna thar siam Elector’s Verification Programme (EVP) chungchang  sawizauin, thla leh atanga hman theih tura tih Elector’s Verification Programme (EVP) chu Special Summary Revision atana siam a ni a, hemi hmang hian dilna, paih leh siam that ngaite thlenna tur NVSP Portal atanga Common Service Centre (CSC) kaltlanga thehluh theih a ni, a ti a.  EVP hmangin khua leh tui ten Electoral Roll a anmahni chungchang kimchang an en theih tur thu leh  Systematic Voters' Education and Electoral Participation Program (SVEEP) kaltlanga  Awareness Campaign leh Polling Station siamthat ngaite thleng pawha hmalak tum anih thu a sawi a.  Rualbanlo/Vohbikte tan Toll Free Number-1950 ah mamawh leh dilna a thlen theih thu leh NVSP Mobile Apps hmangin  mamawh leh hriat duhte a ngaihven theih dawn thu a sawi a. EVP chu internet kaltlanga tih angaih avangin harsatna awm thei ani a, kum hmasa lama Special Summary Revision of Roll   kalpui thin anga kalpui pawh a theih reng tho a ni, a ti a. Election Officer chuan dan ang thlapa hearing  neih anih theihna tur leh nakin zela tihsual a awm lohna turin form fill up dawnah document-te nena a inmil em tih finfiah hmasa phawt thin turin diltute a chah a ni.

Tun tum Special Summary Revision of Electoral Rolls-2019 atan hian  January Ni 1, 2020 chu qualifying date niin, January Ni 1, 2002 chu qualifying age a ni a, roll a lut thar turte leh la awm lo te bakah paih leh siamthat ngai dangte buaipui a ni ang. Ruahman  dan chuan Electoral Roll Draft Copy hi October Ni 15, 2019 hian tihchhuah tum a ni a, hemi ni atanga November Ni 30, 2019  thlengin thuthlen duh neite tan hun hawn a ni ang a. BLO ten an bial theuhah Special Campaign November Ni 2,3,9 leh 10, 2019 ah te an nei ang a. December Ni 15, 2019 ah  thuthlen awm angte thlitfim niin, hemi hnu hian ECI pawmpuina dil ani anga, December Ni 31, 2019 ah Database siamthar leh Supplements chhutchhuah a ni ang a, hemi hnu hian  Electoral Roll siam thar chu nakum  January Ni 1 leh 15 inkarah tlangzarh tum a ni.

Vawiin District Level Standing Committee thutkhawmah hian member-te an kal tha hle a, meeting zawh hnu hian ERO leh AERO-te pualin training neih chhunzawm nghal a ni. Tun tum Champhai District Special Summary Revision of Electoral Rolls-2019 hian District thar Khawzawl District  a huam tel rih dawn a ni.