2348/2022-2023
Champhai, the 17th October, 2022: Vaihlo leh a kaihhnawih hrang hrangte dan hnuaia khuahkhirh anih theih nan leh dan palzuta chete chunga hmalatu tur District Level Task Force on Anti Tobacco, Champhai District chu vawiin chawhnu dar 1 khan an Chairman Pu James Lalrinchhana, District Bawrhsap hovin DC Conference Hall-ah an thukhawm.

District Bawrhsap Pu James Lalrinchhana chuan District Level Task Force on Anti Tobacco chu vaihlo leh a kaihhnawihte khuahkhirha, a tul anga hma la thei tura siam, thuneihna sang tak nei a ni, a ti a. Vaihlo leh adangte dan hnuaia khuahkhirh kawngah theihtawp chhuah a tul thu leh, a bikin ramri dep Champhai District-ah dan anga hma la tura tanrual a tul thu a sawi a ni.

Thukhawm chuan District Level Task Force on Anti Tobacco member nghet ni lo, kum 2 dana ruat thin nominated member ni mekte hun chhhung a tawp tak avang leh ruat nawn danin a phal loh avangin member tur mi 9 an ruat thar a; remchang leh tul dan ang zela siamrem ni se an ti a. Member ruat tharte nen kokim zawka inrawnkhawmna neih bakah Anti Tobacco Squad leh a kaihhnawih committee dangte tihnun thar leh chungchangte pawh an rel bawk.

Heng bakah hian 'The Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) Act, 2003' hnuaia Section 4,5,6 leh 7 bawhchhiat theihna awmte leh dan tlawhchhana hmalak dan turte sawiho a ni a. District Level Task Force-a vuivaina thlente pawh zirchian niin, hmalak dan turte pawh sawiho a ni a. Dan lova ramri kaltlanga phalloh thil foreign cigarette lakluh leh tawlh chungchanga hmalak tulte pawh ngaihtuahho a ni a. District Level Task Force on Anti Tobacco chuan District mipuite chu dan lova foreign cigarette lakluh, chhekkhawl, tawlh leh zawrh chungchanga inthiar fihlim turin a chah a; mipui hnena zirtirna zau zawk neih ni se an ti bawk.

He hunah hian Chief Medical Officer; Principal, Govt. Champhai College; District Information & Public Relations Officer; District Education Officer; Sub Divisional Police Officer; Sub Deputy Commissioner; Superintendent, Excise & Narcotics; Asst. Director, Food & Drugs Control leh Treasurer, Sub-Headquarters YMA Champhaite an tel a ni.