2347/2022-2023
Dated Serchhip, the 17th October, 2022: Central Young Mizo Association (CYMA) leh Mizoram State AIDS Control Society (MSACS) te tangkawp buatsaih, HIV/AIDS hluar zel dona tura hmalakna, ‘Zoram Harh Rawh Campaign’ tih thupui hmanga Mizo hnam lam (folk dance) leh hla (folk song) hmanga Branch YMA te tana intihsiakna neih dan tur chungchang relin vawiin chawhnu khan Serchhip District Level Committee chu an Pi Nazuk Kumar, District Bawrhsap hovin DC Meeting Room-ah an thukhawm.

Meetingah hian Oraganising Committee-a mawhphurtu turte ruat fel niin Chairman ah Pi Nazuk Kumar, District Bawrhsap niin, Co-chairman ah Pu R. Kawlthuama, President Sub- Headquarters YMA chu ruat a ni a, Secretary atan Pu PC Vanlalluna, Secretary, Sub- Headquarters YMA ruat niin, Treasurer ah Pu Zolianmawia, Fin. Secretary, Sub- Headquarters YMA leh Finance Secretary ah Pu K. Laltlanmawia, Asst. Secretary, Sub- Headquarters YMA te chu ruat an ni a. Organising Committee hian Intihsiakna neih dan turte thil tul dangte an lo ngaihtuah ang.

Vawiina Meeting hian Intihsiakna neih hun atan ni 7-11 November, 2022 nise tiin a rel a, a hmun atan Serchhip Auditorium nise tih a ni. Intihsiakna neih lai hian HIV/AIDS dona atana inzirtirna hun neih thin tur a ni dawn a, Branch YMA hrang hrangte chu he hunah hian tel thin tura sawm an ni.

Meetingah hian Pu Saidingliana, Addl. SP Serchhip, Pi F. Lalnisai, SDC Serchhip bakah tlawmngai pawl aiawhte leh kohhran hrang hrang thalai pawl aiawhte an tel a ni.