No.433/2020-2021

Vawiin khan Champhai District Level Task Force on Covid-19 chu an  Chairman leh Bawrhsap nibawk Pu Mark Lalthanliana hovin DC Conference Hall-ah an thukhawm a. Inkharkhip hman chhunzawm anih hnua hmalak zel dan tur leh inkaihhruaina dan hrang hrang zawm tur chungchang an rel.

Pu Mark Lalthanliana chuan inkharkhipna dan hman chhunzawm leh avanga district chhunga kalpui dan tur ngaihtuahho tura meeting koh anih thu sawiin, Sawrkar laipui leh State inkaihhruaina zulzui leh perhsan si lova district tana him leh tha ber tur ngaihtuahho a tul thu a sawi a. VLTF theuhte mawhphurhna a sang hle a, ngaihtuahna fim tak hmanga kan zavaia tanrual angai ani, a ti a. Ramri depa awm kan nih avangin ramri depte ven uluk zual ngaia, pawn lam mite chu rinhlehna mit nena kan thlir reng angai a,  inthlahdul huk lovin zawi zawiin thil awm dante thlir chunga nunphung pangngai zawh anih theihna tura inkaihhruaina dante chu  duan a ni tiin,  thuawihlo a dan palzutte chu  dimdawi an nih loh tur thu a sawi a. Sawrkar Pisa te mipuite rawngbawlna  khaihlak chuang lova kalpui theih dan tur ruahman a ni, a ti a. Member-te chu  infinchhuaha kal chho zel tur leh a tawp thlenga tanhopuiah a sawm a.  Thawhhona tha tak awm chu fakin a hlawhtlin ngei a beisei thu a sawi bawk.

Pu Rex Zarzoliana Vanchhawng, SP Champhai chuan  ramri depah thla khat chuang Police an dah tawh thu leh khaw 18 a hmun 28 ah te an duty mek thu a sawi a. Covid-19 dona kawngah  inrawnkhawma zau taka sawihona neih a tul thu sawiin, District, State leh ram tana tha ber zawn kawngah thawhhona tha tak neih zel angai ani, a ti a. Hmaituamna (Mask) vuah chu  tihmakmawh anih tawh dawn avangin khawlaia chhuak turte hmaituamna hmang turin a chah a,  hmaituamna hmang lote dap tur Police Team an indin tawh thu sawiin,  inkarhlat taka awm leh awm lohte pawh endik anih tur thu a sawi a. Ram leh hnam himna turin dan lo a thiltite chungah action an lak zel dawn thu sawiin, mipuite chu District leh State himlohna  tur ang chi thu thehdarh lo turin a chah bawk a ni.

Pu Lalnunfela Chawngthu, SDO (Sadar) in State guidelines zulzuia duan chhin District tana inkaihhruaina dan chu  District Level Task Force hmaah chhawpchhuakin a sawifiah hmasa a. Vawiin hian MHA leh State Guidelines mila District Level a hman turte uluk taka zirchian a ni a. Hnathawh dan chungchangah State guidelines in a phalte chu District-ah kalpui nise, mahni in leh a vela hnathawk te'n hlawhfa an lak dawnin phalna lak hmasak zel nise, veng chhung ami tan VLTF hnenah, veng pawn atanga la turin an awmna veng VLTF atanga phalna lak nise tih ani a. Mi 5 aia tam chhawr loh nise,  loh theih lohna vanga  tam zawk chhawr ngaihnaah VLTF hriatpuina a DC atang phalna lak nise tih a ni a. Lo a thlai chi thlak leh ei leh bar zawnna kaihhnawih a ram kal turte chu VLTF te'n an dinhmun zirchiangin an phalsak thei ang a, VC area tinah chawhmeh Bazar siam phal niin,  metre 1 vela inhlata awm zel nise ti a rel niin, VLTF chu  home delivery kalpui kawngah  thuneihna pek an ni a. Feh chhuanlam hmanga ramvah leh lui dunga  Sangha man  khap a ni a. Bazar hun atan zing dar 8 atanga tlai lam dar 5 thleng ruat niin, nitin mamawh ei leh bar, insakana bungrua, ran damdawi leh Agriculture lam mamawhte kartin Thawhlehni, Ningani leh Inrinni-ah te lam theih nise, Damdawi dawr erawh nitin hawn nise tih ani a. Thingtlang  lam atanga Bazar duh tan erawh Pathianni tih lohah Bazar hun tiam chhungin  Bazar theih nise, an lei duh thil leh hmun bakah a hunte an kal duhna VLTF te hriattir lawk thin nise tih a ni bawk.

Meeting chuan thil zuartute uchuak taka an thil zawrh hralh lo tura ngenin,  Bazarna hmunah metre 1 vel tala inhlat nise, veng/khaw  chhunga inkalpawh phalna  VLTF ten an pe thei anga , District chhung leh District  inkar chu DC leh Incident Commander kutah dah a ni a. State pawn atanga bungraw lakluh chungchangah nitin eibar la tur tan DC Office-ah dilna siam nise, bungraw dangte erawh DC kaltlanga Home department lama dilna siam nise tih a ni a.  District pawn lam atanga bungraw lutte rang lama hlanthlak anih hnuah tei khawmuang lova kir tir leh thin nise tih a ni a. State pawn lam atanga bungraw phurte pawh mipuite chimbuai lova an awm theih dan turte sawihoa pawm ani a. Khawbil inkharkhip kalpui loh nise tih niin,  kum 65 chin chunglam leh natna benvawn neite chu inenkawl tha a in lama tawmim hram hram tur leh mawhphurhna pek loh nise tih a ni a. Duty post tinah mi 5 aia tam awmkhawm loh leh mitthi vuinaah mi 20 aia tam kal loh nise tih niin,  vahchhuahna hmunah hmaituamna hman vek tur tih thuchhuah  chu khauh taka kalpui nise tih a ni bawk.

Meeting zawh hnu hian Sub-Hqtrs MHIP Champhai aiawhin an pawl President Pi Lalhlimthangi Khiangte chuan District Level Task Force on Covid-19 Chairman Pu Mark Lalthanliana hnenah tanpuina pawisafai Rs 10,000/- a hlan a ni.