No.432/2020-2021 

Minister Pu R. Lalzirliana chuan vawiin khan a bial Tawi constituency chhung khaw hrang hrang te fang kualin, Village Level Task Force (VLTF) te hnenah chhawmdawlna sum leh kut tihfaina (hand sanitizer) te a pe a; Health/Clinic Centre leh Sub Centre hrang hrangte mamawh medical equipment te a ken sak bawk. Pu R. Lalzirliana hian a hma in tum thum lai a bialte tan lo che chhuak tawhin, VLTF te tan sum fai leh medical equipment te leh mi harsate mamawh eitur a lo hlan tawh bawk a ni. A bial chhung khaw hrang hrang a fanna ah hian Village Level Task Force ten tlawmngaia ram leh khaw tana an inpekna lawmawm a tih thu leh, natna hlauhawm a len lai a mahni pawh inngaihtuah chang lo a mipui te him nana an thawkchhuak chu kan hnam ziarang “Tlawmngaihna” tichiangtu ber a nih thu a sawi bawk. 

Minister Pu R. Lalzirliana chuan Village Level Task Force te chu Sawrkar thuchhuak ngaichang chung zel leh fimkhur taka ruahmanna siam thin turin a chah a; mi chhuanchham, ei leh bara harsatna tawk an awm chuan a theih anga anga puih zel a tum thu leh a rang thei ang bera amah hriattir zel turin a chah bawk. Ram pumah lockdown hi kalpui mek a nih mek rualin thlai chi thlak hunlai a ni a, mahni khaw ram chin a lo neia eizawng ten ei leh bara harsatna an tawh zel loh nan an lo/huan an enkawl a tulna chin a awm avangin a tul anga ngun taka ngaihtuahpui tur leh, harsatna an tawh lohna tura fimkhur tak chunga ruahmanna siamsak turin VLFT te hi a chah bawk.

Pu R. Lalzirliana chuan COVID-19 hripui leng mek hi a damdawi a la awm theih loh avangin, lockdown a zawh hunah pawh a bial chhung mipui te chu engemaw chen an fimkhur chhunzawm zel rih a la ngai dawn a ni tih a sawi a, awlsam taka in kaichhawn theih a nih miau avangin mahni chauh inngaihtuah lo a, khua leh ram himna tur dah pawimawh hmasa tur leh dawhthei tak leh thu awih taka kan him tlan theihna atana sawrkar thuchhuak zawm zel turin a bial mipui te a chah bawk.

Kan Police te leh Village Level Task Force te bakah kan sawi hmaih hauh lo tur ramri dep a kan Mizo unaute chhun zan zawma ram leh hnam tana fehchhuak te an fakawmin, ram leh hnam tana an inpekna hi kan hlutsak a kan hriatpui a tul hle a ni tih sawiin, Pathian khawngaihna leh VLFT leh tlawmngaia thahnemngai tak a penchhuak te zarah kan Zoram chu he hri lakah pawh kan la him zel niin a lang a, Pathian chungah leh kan hotute chungah ka sawi tak zet zet a ni, a ti bawk.

Minister in a bial a fan lai hian thlipui leh ruahpui thawk thu avangin a bial chhunga khua Selingah in 2 chimin hliam 2 damdawiin pan pui nghal an ni a, in  5 dang a len chhe vek bawk a, Tuikhurhlu ah in 5 a chung a la vek a, Thingsul-Tlangnuamah in 1 luah tlak lohin a len chhe vek bawk a, in panga dang a chung a la vek bawk a ni. Minister hian heng chhiat tawhna hmun te hi tlawh nghalin a theih ang angin tanpui dan tur a ruahman nghal a ni.

Pu R. Lalzirliana hmalakna in March ni 31, 2020 khan Saitual (VC-I, Venglai VC, VC- III), Keifang, Seling, Thingsul-Tlangnuam leh Thingsulthliah Village Level Task Force-te hnenah an hman tangkai turin kut tihfaina (hand sanitizer), kutkawr (hand gloves) leh hmai tuamna (mask) engemawzat pek an ni tawh a. April ni 2, 2020 khan Tawi bial chhung khaw hrang hranga a mamawh te hnen a sem turin - Buhfai bag 50, Dal bag 9,  Alu bag 30 leh Purunsen bag 20 chu khaw hrang hranga  Village Level Task Force-te hnenah hlan a ni bawk.  Heng bakah hian April ni 9, 2020 khan Face Mask a thui tur puanthan (cotton) pawh Rulchawm tan metre 9, Mualpheng tan metre 6, Seling tan metre 15, Thingsul-Tlangnuam tan metre 10, Thingsulthliah tan metre 19 bakah hand sanitizer leh mask VLTF te pek an ni tawh bawk.

Gloves 850, Mask-(readymade) 300, hand sanitizer-25 Ltrs & 100 ML (238 bottles) te sem a ni tawh a ni. 

VLTF te chhawmdawl hetiang hian sum pekchhuah a ni tawh bawk :