No.5096/2020-2021  

Dated Champhai, the 15^th September, 2020: Vawiin khan Champhai District Level Task Force on Covid-19 (DLTF) chu Bawrhsap Pi Maria C.T Zuali, Chairman, District Level Task Force on Covid-19 hovin I&PR Conference Hall-ah an thukhawm. Covid-19 hrileng ven kawnga district hmalaknate thlirho niin, district pum huap inkaihhruaina khairual tak VLTF tinte zawm tur siam chungchang ngaihtuahho a ni. 

District Bawrhsap Pi Maria C.T Zuali chuan Covid-19 hripui leng dona kawnga theihtawp chhuaha thawktute fakawm  a tih thu sawiin, Covid-19 hri leng darh tur venga hun rei tawh tak atanga  tha leh zung sen anih avangin nitin khawsak phung leh sum leh pai dinhmun a nghawnga, fimkhur taka sawrkar siam inkaihhruainate zawm chunga nunphung pangngai zawh leh tuma insiamrem thiam a tul a ni, a ti a. Mipuite tithlabar leh tichiai zawng ni lova kal thiam angaih thu leh huai taka dan leh dun zamte zawm chunga hmalak a tul thu sawiin, Champhai district mipuite Covid-19 hri leng kara nunphung pangngai zawha, himna tura inkaihhruaina sawrkarin a siamte zawm theuh turin a ngen nghal bawk a ni. 

Champhai SP Pu Rex Zarzoliana Vanchhawng chuan Champhai district chhunga thawhhona tha tak awm chu chhuanawm a tih thu leh nakin zelah pawh thahnemngai taka thawhho zel a beisei thu a sawi a. District lian tak Champhai district chhunga thawktu hrang hrangte hmalak dan chu a fakawm takzet a ni, a ti bawk.

Meeting chuan Covid-19 laka himna tura invendan leh inkaihhruiana siam hmaituamna, kut silfai ngun leh inhnaih lova awm  chungchangte zau zawka inzirtirna neih nise a ti a. Sawrkar duan inkaihhruainate ngawipawimawh chung zela nitin ei leh bar zawnna kawnga bahlah chuang lova hmalak anih zel theihna turin Incident Commander-ten an bial theuha VLTF te hnenah fimkhur tak chunga nunphung pangngai zawh chunga nitin khawsak buaipui dan turte zirtirna leh hrilhhriatna nei se tih a ni a. Sate pawn atang lo haw/lokal tawh phawtte chu sawrkar dan anga Quarantine-a Covid-19 test zel nise tih niin,  Aizawl leh hmun dang atanga lo haw/lokal te Home Quarantine thin an nih chungchang pawh he hunah hian sawiho a ni a, District Magistrate-in tun thla September Ni 1, 2020 a thuchhuah a lo siam tawh, Champhai District chhung khuaahte  State dang emaw, Red Zone atanga rawn haw/lokal nilo leh Positive contact neilo lo haw/lokalte khunghran (Quarantine) khap tlat a ni, tih chu District chhung khua leh veng hrang hrang VLTF te’n zawm theuh se, Health Department hotute leh Incident Commander-te nen inberawn zelin an niin khunghran ngai ni a an hriat lohte chu lo khunghran tawh loh nise tih a ni bawk a. Heng bakah  hian inrinhlelh emaw, Covid Free Certificate neih ngai  Covid-19 in test duhte tana ruahmanna siam anih theih dan turte pawh sawiho a ni bawk. 

Thukhawm chuan mitlawmngai leh thilphal tak takte atanga DLTF Champhai district hnena tanpuina sum lut hman dan tur a ngaihtuahho nghala. Kumin March thla atanga ramri venga awmhmun  khuar mek Police mi 42 te hriselna endiknan leh a bik takin Malaria leh Rannung seh Scrub Typhus an  vei leh vei loh endikna tura senso buaipuina tur pek nise a ti a. Sub-Headquarters  YMA Champhai kaltlanga chhawmdawlna pek nan leh a tul anga hman  a tan ruahman a ni.

Vawiin ni thlenga DLTF Champhai kuta Covid-19 dona tura tanpuina sum lut tawh zat chu avaiin Rs 7,05,100/- a ni a, hman ral tawh zat chu Rs 4,42,475 niin, tun dinhmuna sum kawl zat chu Rs 2,62,625/- a ni.