No.5095/2020-2021   

Vawiin ni 15 Thawhlehni khan DLAO Lunglei leh NSS Unit Lunglei Government College te tangkawp buatsaih khawtlanga dikna leh rinawmna dinhmun enfiahna  Local Level Integrity Perception Survey  2020 result chu Lunglei Addl. Deputy Commissioner Pu R. Vanrengpuian, Excise Conference Hall, Lungleiah  a tlangzarh.

He hun hi Pu R. Lalrochama, Associate Proffesor, Lunglei Government College in a kaihruai a, khuallian Pu R. Vanrengpuia chuan hetianga dikna leh rinawmna,  khawtlanga a dinhmun hre tura theihtawp chhuah a beitute chu an fakawm tih sawiin a bik takin sawrkar hnathawkte tan phei chuan dikna leh rinawmna a inpum pekna chu an tih makmawh a nih thu a sawi a. Mitin ten mawhphurhna kan neih theuh rinawm taka tihhlawhtlin chu a apwimawh tih sawiin nihna hmachhuan lova rilru dik tak pu a mahni hmazawna tih tur awm tih hlawhtlin chu mitin mawhphurhna a ni a ti bawk.

Sawi hawnna hun hmangtu Lunglei DLAO Pu J. Miahlung chuan Local Level Integrity Perception Survey  nei tura NSS Unit Lunglei Government College te nen an thawh ho dan sawiin NSS member 50 ten kohhran hruaitu, khawtlang hruaitute bakah hna hrang hranga thawk ho hnenah fehchhuaka zawhna an pek chhuah dan a sawifiah a, mi 533 hnenah zawhna hrang hrang pein a chhanna hi an lak khawm leh thu a sawi a ni.

Vawiina tlangzarh tak Local Level Integrity Perception Survey  result in a tarlan danin survey neihna chinah za zela 78 te chuan Village Council-te eirukna lakah an fihlim an ring lova, chhangtu 48% te chuan an thawhpui thenkhatte eirukna lakah an fihlim lovin an sawi bawk. 68% te chuan an hotute atanga thil diklo ti tura nawrna an tawn loh thu an sawi laiin 29% te chuantawng tawh angin an insawi ve bawk. 78% in an veng chhunga hlawh leh sum lakluh phu lova hausa an awm nia sawiin 22% te chuan an hriat ve lem loh thu an sawi bawk.

Pu Thanglianmang Guite, MJS, District & session Judge, Lunglei pawhin thu sawiin he hunah hian Kohhran hrang hrang hruaitu, Tlawmngai pawl aiawh, Village Council, Prominent Citizen leh Sawrkar Department hotute bakah Chanchinbumite an kal khawm a, rinawmna leh hlem hletna chung changa ngaihdan hrang hrang awmte an sawi ho nghal a ni.