No.5094/2020-2021   

Mamit 15th September, 2020 : Vawiin khan Mamit District Hospitala hman turin Truenat Laboratory (Biosafety Level - 2) chu hman theiha hawn a ni a. Covid - 19 vei leh veiloh hriatna tur Truenat Laboratory khawl hi Dr Lalrozama, IAS District Bawrhsap chuan vawiin khan a hawng.

District Bawrhsap chuan tunlai hripui avanga mipuite kan buai laia Covid - 19 hrik hmuhchhuahna khawl kan District-in kan nei ve ta chu lawmawm a tih thu a sawi a. Thawktute thahnem ngaihna leh sawrkar chungah lawmthu a sawi a ni. Tunah chuan Covid-19 hri vei leh veiloh endik tura Aizawl lama sample inthawn ngai thin, keimahni hmun ngeia kan ti thei ve ta chuan kawng tam takah awlsamna a thlen a beisei thu a sawi.

Truenat Laboratory hawnna hun hi Mamit District Hospital Eye Building-ah Dr T. Lalrintluanga, District Medical Superintendent (DMS) kaihruaina-in neih a ni a. Dr Lalzuatliana, Truenat Laboratory, MO incharge chuan technical report pe-in he khawl hmang hian vawikhatah Sample pali zel test theih a nih thu a sawi a. Sample vawikhata lak endik nan hian darkar 1 leh 45min atanga darkar 2 vel hman a ngaih thu a tarlang bawk. Truenat Laboratory khawl thar-ah hian a vawikhat nan vawiin hian sample 16 test nghal a ni dawn a. Ruahman lawk ang chuan Sample hi Thawhlehni, Nilaithawhtan leh Inrinna-ah te test tura ruahmanna siam a ni a, tulbik thil leh mamawh dan a zirin heihi siam danglam leh theih a nih bakah emergency thilah chuan engtik lai pawha test theih a nih thu tarlan a ni bawk. Truenat Laboratory atana hman tur Deep Freezer hi tunah hian kalkawngah a thang meka, mipui mamawhna a san tawh avangin CMO, Office- in an kawl lai deep freezer (-25) degree celcius thleng chauh vawng theia bul tan a nih thu tarlan tel a ni bawk.

Truenat Laboratory khawl thar hi a enkawl tur bika training chhuak Doctor 1, Lab Techician 1, DEO 2 te chuan an vil dawn a ni.

Truenat Laboratory khawl thar hawnna hunah hian Addl SP, CMO, SMO, khawtlang hruaitute leh tlawmngaipawl hruaitute bakah District Level Task Force on Covid - 19 members- te an tel bawk a ni.