No.6424/2020-2021

Dated Champhai, the 11th November, 2020: Vawiin khan Champhai District Level Task Force on Covid-19 chu Chairman Pi Maria C.T Zuali, District Bawrhsap hovin Covid-19 hripui leng mek ven kawnga hmalakna hrang hrang leh hmachhawpte relin DC Conference Hall-ah an thukhawm.

Bawrhsap Pi Maria C.T Zuali chuan Covid-19 hripui leng mek karah tun dinhmunah Champhai District chu fihlim rih mahse nakin zel tur ngaihtuah angaia, vantlanga inkaidarh thlenga awm thei anih avangin hmalak dan tur ruahmanna felfai tak siam lawk angaih thu a sawi a. Rilru fim tak nena hmalak dan tur leh hmachhawpte a theih chen chena ruahman lawk a tul thu sawiin, ei leh bar zawn kawnga bahlah chuang lova sawrkar duan inkaihhruainate ngaipawimawh chung zela khawsak thiam a tul a ni, ti a. Champhai district mipuite chu mahni theuh fimkhur taka nung tur leh himna tura inkaihhruaina siamte zawm hram hram turin a chah a ni.

Champhai SP Pu Rex Zarzoliana Vanchhawng chuan Covid-19 No Tolerance Fortnight hman mekah sawrkarin inkaihhruaina a siam zawm lote enfiah anih thu leh himna kawnga inzirtirnate kalpui pah reng anih thu a sawi a. District Level Task Force member-te chu hnathawh leh duty dante thlirpuia ngaihven turin a sawm nghal bawk a ni.

CMO Dr.R.Lianmawia pawhin thu sawiin, Covid-19 hri kai darh zel tur ven kawnga pawimawh tak Contact Tracing Team leh Sample Collecting Team-te mumal taka kalpui anih thu sawiin, contact tracing bikah rinhlelh kai zualte ngaihpawimawh hmasak thin an nih thu a sawi a. Covid-19 hrikaite enkawlna hmun Covid Care Centre-ah khum 34 leh Dedicated Covid Health Centre (DCHC) ah khum 42 awm thei tura ruahmanna siam anih thu a sawi a. Covid-19 hri kai leh kai loh endikna Rapid Antigen Test (RAT) tihna Test Kid 50 dang, a hmaa lo sem tawh bak chu Champhai District chhunga PHC 5 ah te pekchhuah tum anih thu sawiin, mamawh leh tul zual bika hman tur anih thu a sawi bawk.

Meeting-ah hian mamawh thulha hman mai theih tur Ventilator 4 District Hospital Champhaiah a awm thu tarlan a ni a. CCC a khum awmte tun dinhmunah mamawh phuhru rih mahse nakin zela hman theih turin khum dangte pawh thuamthat nise tih a ni a. Ramri dep khuate hnenah fimkhur zel tura hrilhhriat nawn fo nise tih niin, Covid-19 vanga khua leh khua inthinhrilkna awm theite enzuia thleng lo tura mipuite zirtir nasat nise tih a ni a. Zin veivakte phurtu Lirtheiahte passenger list felfai tak a awm leh awm loh ngun taka vil zui zel nise tih a ni bawk a. Sawrkarin mipuite himna kawnga thuchhuah leh inkaihhruaina a siamte tha taka zawm anih theihn tura inzirtir uar deuh deuh angaih thu pawh tarlan niin, awlsam zawka contact tracing tih anih theihna turin ‘Sulhnu App QR Code’ hman uar leh hman dan inzirtir kawngah tanlak zel nise tih a ni a. Covid-19 No Tolerance Fortnight hman mekah veng tin VLTF Member-te chu an huam chhung theuha endikna kalpuite lo tawiawma enpui thin tura sawmna siam nise tih a ni bawk.

He hunah hian Incident Commander hrang hrang te’n an bial chhung theuha hmalakna leh thil thlengte an report bawk a ni.