No.638/2021-2022

Dated Champhai, the 22nd May, 2021: Vawiin khan District Level Task Force on Covid-19, Champhai District chu DC Conference Hall-ah an thukhawm a, he hunah hian hripui leng avanga inkhuahkhirhna kalpui mek thlirletna leh awm zel dan turte Chairman Pi Maria C.T Zuali, District Bawrhsap kaihhruaiin ngaihtuahho a ni.

Pi Maria C.T Zuali chuan Covid-19 hrileng dona kawnga Mizoram vanneih bikna chu tha thlah lova sawrkar tawiawm tlattu VC, NGO leh Kohhrante an awm vang a nih thu leh, thawhhona tha tak avangin Champhai District chuan tun dinhmun hi kan thleng thei a ni, a ti a. Fimkhur chhunzawm zel a tul thu leh hrikai lo tur leh midangte kaia pudarhtu ni lo tura sawrkarin inkaihhruaina a siamte tha taka zawm a tul thu a sawi a. Hlawh phut lova thahnemngai taka sawrkar thlawpa tawiawm tlat thintu VLTF te chungah lawmthu a sawi bawk.

Thutkhawmah hian Champhai District chhunga hrileng dona kawnga hmalakna hrang hrangte chu tha thawkhat viau a hriat a nih thu leh tun dinhmunah Champhai District Zokhawthar khua Containment Zone a puan tih loh Covid-19 postive hmuhchhuahte hmun hran atanga lo haw khunghran laite an nih tlangpui thu tarlan a ni a. Inkaihhruaina thar hman leh tura bazar leh dawr hawn hun chungchangte, hnathawh chungchangte ngun taka ngaihtuahho a nih hnuah District mila ruahmanna tharte duan chhin niin, Mizoram sawrkarin inkaihhruaina thar tur a tihchhuah ngaihchan phawt nise, chumi zulzui chuan District tana him leh tha tur inkaihhruaina tihchhuah nise tih a ni.

Champhai District chhungah khawtlang hmalakna kaltlanga Covid-19 hrikai, natna langchhuaklo leh ngaihtuah awm lutuk lote enkawlna tur Community Covid Care Centre (CCCC/4C) din a tul thulh pawha hmalak nghal mai theih tura ruahmanna siam chungchangte sawiho a ni a. CCCC chungchanga hriattur tulte CMO Champhai Dr. R.Lianmawia hnen atanga ngaihthlak a ni a, VLTF te chu Mizoram pawn atanga lo haw an bial chhunga mi khunghrante enzui thin tur leh CMO Office lama hriattir zel thin turin  a chah a ni.

Meeting chuan chawhmeh, thlai leh theite rualkhai taka sem leh buaipui tham thlai leh thei tharte tana ruahmanna siam dan tur  Vegetable Supply Chain chungchang pawh ngaihtuahin, Nodal Officer atan DHO Champhai Pu B.Lalzarzova chu a ruat a. He hunah hian Champhai District paltlanga raltlan haw thin chungchang pawh ngaihtuah niin, hri laka him tlan nan leh ramri kaltlanga dan lova thil tih awm palh thei ven nan ruahmanna felfai tak siam a ni bawk.