No.637/2021-2022

Aizawl, 22^nd May, 2021 : Health & Family Welfare Minister Dr R. Lalthangliana chuan vawiin khan  Zoram Medical College (ZMC) tlawhin COVID-19 hri kaite enkawlna kawnga hmalakna te a en bakah hmalak chhunzawm dan turte a en a ni. Minister hi Medical Operational Team Chairman Dr ZR Thiamsanga, MLA, Horticulture Development Board Vice-Chairman Dr F. Lalnunmawia, MLA, Pu R. Lalramnghaka, Special Secretary, H&FW bakah Health department officials leh Medical Operational Team ten an tawiawm a ni.

Health Minister chuan Mizoramah COVID-19 second wave hian a zia a rawn thlak avangin kan rin phak bak harsatna kan tawk a, hri kai tharte zingah symptom nei an pun bakah, a tira symptom nei lo, a hnua symptom nei ngaihtuahawm tak tak kan ngah sawt hle a. Hmun dang kan ngaihthah dawn tih ni lovin, COVID-19 hri kai dinhmun ngaihtuahawm deuhte kan enkawlna hmun Zoram Medical College hi tuna tan chuan kan insawrbing deuh a tul a, kan dinhmun thlir zelin damlo enkawlna tur khum leh an mamawh dangte kan ngaihtuah a tul a, hei vang hian chawlh lai pawh ni mahse ZMC hi kan ngaih pawimawh a ngai a ni, a ti.

Health Minister hian tunhnaia Zoram Medical College a Oxygen Generating Plant siam thar chu a tlawh a, ZMC Director Dr John Zohmingthanga leh a thawhpuiten lo dawngsawngin an dinhmunte an lo hrilhfiah a ni. Oxygen Generating  Plant hi tun dinhmunah chuan tluang takin a kal thei rih a, damlote mamawh pawh pekchhuah niin, Mizoram dinhmun thlirin hmanhmawh takin oxygen generating plant dang pahnih siamna tur hmun laih mek a ni bawk a ni. ZMC-a COVID-19 hri kaite enkawlna tur ward hrang hrang pangaa khum awm zawng zawng tunah hian luah khah a ni a.  Ward no. 6 sak mek chu Health Minister hian tlawh nghalin, a tul ang ang peihfel nghal tura tan la turin contractor-te leh ZMC hotute a chah a, kan dinhmun a hriat loh a, thawhtanniah tal chuan damlo dah luh theihna tur khawpa peihfel a tul tawh a ni, tiin khum awm thei zat tur leh tul dangte rang taka lo zirchiang nghal turin a hrilh a ni.

Health Minister chuan kan hripui hmachhawn mek hi chhiatrupna kan lo hmachhawn tawh thin nen a boruak a inang lovin ngaihtuahna sen thiam pawh a har hle thin a, vawiina tha nia kan hriat pawh naktukah a aia tha zawk a lo awm leh a, khawvelin inpuahchah ngaihna a hriat loh a nih avang hian a harsa hle a ni, a ti a. Mizoramah erawh tu tih tura dah bik lova kohhran , khawtlang leh mipui zawng zawng kan tangrual hi a lawmawm takzet a, hei hian kan tha a tichakin min nawr kal thin  a, tihsual palh leh fuh lo palh kan hriat pawhin kan tih dan ang hian thawktute, ral hmatawnga awm te rilru tihnual lo zawngin, thurawn tha tak tak min pe turin kan inhawng reng a ni, a ti a. ZMC COVID ward thar atana LPS Vision ten mattress 30 leh washing machine 2 an pekah lawmthu sawiin, Horticulture department in dawnfawh thahnem tak an pe a, heng bakah hian mimal leh pawl hrang hrangin tanpuina an pe zel hi thinlung takin lawmthu ka sawi a, Mizote kan inhmangaihzia hei hian a tarlang thin a ni, a ti.

Dr. Thangtea chuan sawrkarin thutlukna a siam angin CCC-a enkawl mekte tan ei leh in man chawi a ngai dawn lo tih a sawi a,  tunhnaiah ZMC laboratory-a sample test tute a kar inzawnin positive hmuhchhuah an awm nual vangin tunhma angin sample test kan kalpui thei lova, result nghaktuten thawktute dinhmun hrethiama lo nghak hram hram turin a ngen a ni.

Medical Operatinal Team Chairman Dr ZR Thiamsanga chuan dam lo kan tam zela, khum kan indaih tawh si lova, thawktute an hahin an lu a hai tawh hle a ni, a ti a. COVID-19 hri kai hmuhchhuah thar zingah symptom na taka nei (serious) an pung zel hian an mang a ti ang tih a sawi a, ZMC ah khum a tam thei ang ber kan dah a, kan insawrbing a ngai a ni, a ti a. Zoram mipuite tawiawmna kan mamawh takzet a ni tih sawiin, ZMC-a thawktu zawng zawngte inpeknaah lawmthu a sawi  bawk a ni.

ZMC ward thara khum dah belhin a ken tel tur thawktu, a bikin nurse leh a tul ang ang thawktu nurse leh hospital attendant hi MOT chuan an tam dawn tih an sawi a, nurse ringawt pawh a nihna ang taka function tur chuan 200 chuang an ngai dawn tih an report a ni. Mizoram College of Nursing atangin final year zirlai 26 in volunteer-in thawhtanni atang hian ZMC ah an lut dawn a, heng bakah hian National Health Mission hnuaia Health & Wellness Officer training la zo engemawzat an tel dawn bawka, emergency-a awm a nih chuan Aizawl Civil Hospital leh hmun danga thawktute pawh chah theih tura  hriattir ni tawhin, Private damdawi in neitute pawhina tul a nih chuan an mi leh sate pawh an thawh hreh loh thu an sawi a ni.

Health Minister chuan he hripui kara kan tum ber chu nunna chhanhim a ni a, Chief Minister zahawm tak pawhin hei hi a ngaih pawimawh ber a ni, tiin nunna chhan turin theihtawp lan chhuah zel dawn a ni, a ti a. Hemi atana ZMC thuam thatna tura pawimawhte pawh inthlahrung lova sawi zel turin a chah a, Non-Government Hospital Association, Mizoram chungah oxygen chungchang bakah khawl mamawh chi hrang hrang man to tak tak te thleng a thlawna an hawh tir thin  vangin lawmthu a sawi a ni.