Vawiin chawhma dar 11:00 khan DC Conference Hall, Keifangtlangah District Level Vigilance & Monitoring Committee chu an Chiarman Pu CL Ruala, Lok Sabha MP hovin an thukhawm.

He committee-ah hian Champhai District huam chhunga Rural Development hna hrang hrang kalpui dan thlirho a ni a. Power & Electricity Deptt. in RGGY an kalpui mekah District dangte ang bawkin hmalakna a chak tawk lo tih tarlan a ni a. Electric la luhna khua 9 zingah tunah hian khaw 6 chu zawhfel tawh a, BLP te hnena eng pek hi kumin chhung ngeia zawhfel tura tih a ni. DRDA in rural development hrang hrang an kalpui dan he hunah hian tarlan niin MGNREGA ah an sum hmuh zawng zawng chu Rs.Nuai 1670.412 niin ni 32 inhlawhna zawhfel tawh a ni a, tunah hian ni 5 inhlawhna tur daih sum an la nei a ni. MGNREGA-a ni 100 inhlawhna tur pawisa hi central-in hnathawh that dan a zirin an rawn pek thin avangin an hmalakna te a rang thei ang bera MGNREGA website-a upload thin nise an ti a. Hei bakah hian kumin chhungin BNRGSK building khaw 20 a sak tur chu MLA ten an bial fan pahin a that leh that loh lo enfiah nise, an hmuh dan te chu committee-a hriattir thin tura ngen nise tiin an rel a ni. SGSY an kalpui danah DRDA hian BDO ten SHG te loan hmu tura an recommend tam tak chu bank lamin loan an pek that loh avanga harsatna an tawh dan te tarlan a ni a. IAY scheme hnuaiah kumin August ni 31 thleng khan Champhai District a RD Block 4-ah in sak thar 90 leh sak that 68 an nei a, chhiatrupna lo thleng (natural calamity) ah report awm chu pek nghal zel an nih thu sawilan a ni bawk.

DRDA hnuai veka IWDP kalpui pawh chipchiar taka sawiho a ni a, IWDP hi IWMP in a thlak dawn tak avangin project hrang hrangte chuan data dik tak hmang thei hram se an ti a, IWMP ah hian Champhai District ah project pahnih kalpui mek a nih thu leh Project II bika hnathawh turte pawh tihfel a nih tawh thu te tarlan a ni a. IWMP hmalakna hi uluk taka vil nise tiin an rel a ni.

Hei bakah hian PWD, NEC Division, Champhai leh Khawzawl in PMGSY-a an hmalakna leh PHE WATSAN Division, Champhai leh Khawzawl ten RWSP an kalpui dan te thlirin sawiho a ni.

Meetingah hian Co-chairman Pu Lalhmingliana, Rajya Sabha MP leh Pu B.Lalthlengliana, MLA te bakah District Level Vigilance & Monitoring Committee member te tel tha hle.