Champhai District-a Sorkar laipui hmalakna hrang hrang hnuaia sum hmuh leh hmandan endik tura din District Level Vigilance & Monitoring Committee chu vawiin khan an Chairman Pu C.L.Ruala, MP(LS) leh Co-Chairman Pu Ronald Sapa Tlau, MP(RS) hovin DC Conference Hall-ah an thukhawm. Kum 2015-2016 chhunga hmalakna thlirhonaah hian Champhai District-a bialtu MLA-te zingah Pu JH Rothuama, NIB Secretary (Champhai South A/C), Pu T. Sangkunga, MYC Chairman (East Tuipui A/C) leh Pu TT Zothansanga, Parliamentary Secretary (Champhai North A/C)-te an tel a ni.
Committee Chairman Pu C.L.Ruala chuan kalkhawmte kumthar chibai bukin, quarter tin a meeting neih thin hi member ten tih dan phung pangngaiah nei mai lova, hmasawnna tak tak thlentu ni thei se a duh thu a sawi a. Sorkar laipui scheme hrang hrangte kenkawh chungchangah a kaihhnawih Department-te theuh chu thahnemngaihna rilru pu tlang turin a duh thu sawiin, plan siam chungchangah te pawh ennawn fo ngailo turin uluk takin ngaihtuahna sen a, a hun taka a tha thei ang bera hna zawh tum turin a chah a. Mahni Department theuh chanpual hnuaia hna te chu vil ngun turin leh, hnathawh thalo leh harsatna thlengah MLA te hnenah thlen thin turin a chah bawk.
Committee Co-Chairman Pu Ronald Sapa Tlau, MP(RS) chuan vawiin thutkhawm a member-te an kal that avangin lawmthu sawiin, hmalaknate thlirho a harsatnate sawi hian rah tha a chhuah a, ram hmasawnna kawng dapchhuahna remchang a nih thin thu a sawi a. Member-te hnenah chuan an hnathawh kalphungin mipui tan thil tha leh remchanna a thlen em tih ngaihtuah tel thin tur a ni, a ti a. Rajya Sabha MP chuan Mizo te hian thing leh thlai thar kawngah hian thiamna bik tak kan neia a hriat thu tarlangin, tunah pawh hian State pawn leh ram dang hla zawk pawha an ngaihhlut em em thei leh thlai hrang hrang Mizorama tha thei si chu hlawk zawka thar dan tur ngaihtuah mek a nih thu a sawi a. Chung zingah chuan man man zawka Sapthei hralh a nih theihna tura ram dang mite dawr mek anih dan tarlan a ni.
Meeting-ah hian Champhai District DRDA hnuaia MGNREGA hmalakna tarlanah, 2015-16 chhungin Champhai District a Job Card 27,814-te hnenah Ni 35 inhlawhna atan Rs. 1781.49 lakhs pek anih tawh dante, Co-Chairman Pu Ronald Sapa Tlau hmalakna hnuaia Champhai DRDA leh Horticulture Department tangkawpten Champhai khawpui chhunga loneitu mi 8 te hnena Khawthlang Apple tha chi chin chhin tir an nih dan te thlirlet a ni. PHED nen tangkawpin Swachh Brarat (Gramin) hnuaia Champhai District chhunga khua 80 zinga 52 chu Ek In awmlo awm tawh lohna (Open Defecation Free/ ODF)-ah puan tawh niin, tun Sorkar kum chhung hi chuan rural areas zawng chu ODF-a puan tum a ni. MGNREGA leh Department dangte nena thawhhona (Convergence) hian Model Village a hmalaknate pawh a huam thu tarlan a ni.
Indira Awaas Yojana hnuaiah January thla thlengin chhungkaw 36 te hnena tanpuina pek anih tawh dan leh 2nd Installment nghah mek a nih thu tarlan a ni a. IAY hnuaia hamthatna dawngtute zinga chhinchhiahna tar tichingpente leh tar tha duhlo te chu pawisa chawi tir an nih thu te tarlan a ni a. Champhai District chhunga IWMP Project pasarih-a hmalakna hrang hrangte ennawn niin, a boruak mil a thlai leh thei chin tur bik bithliah thiam a tul dan thu sawi a ni a. Champhai District chhung RD Block 4 ten 2014-2015 chhung leh 2015-2016 chhunga BADP hnuaia hmalakna peng hrang hrang: Education, Agirulture & Allied, Infrastructure, Social, Security & Capacity building atana ruahman, he huna chhawp chhuahte chu meeting-ah hian thlirho a ni.
PMGSY scheme hnuaia khawkar kawng laih (Khuangleng to Lianpui, Thinghrang Kawn to Bungzung, Thinghrangkawn to Vangchhia leh Khawbung to Khuangthing, Chhawrtui to Rullam) hnathawh chungchanga harsatna hrang hrang awm te leh, a chhawrtu tur mipuite harsatna a thlen loh nana chak zawka hmalak zui dan turte thlirho tel a ni a. NRDWP hnuaia PHED hnathawh te thlirho a nih bakah, Swachh Bharat Mission (G) leh Nirmal Bharat Abhiyan hnuaia faina leh thianghlimna kawnga hmalakna te sawiho niin, Model Village-te chu ngaih pawimawh bik an nih thu leh, bawlhhlawh sawngbawlna (dumping ground) changtlung tak siam zawh tawh leh siam tur hmun ruat a la awm thu tarlan a ni.
National Social Assistance Programme hnuaiah tar pensioner in register mi 2760 awmin, hmeithai tanpuina pek tur mi 266 register an awm bakah rualbanlo (disabled) mi 74 in register an awm a. Pension hi Bank Account kaltlanga aiin pawisafaia pek a la tam rih zawk a ni. Vawiin meeting-ah hian SSA, RMSA leh National Health Mission hnuaia hmalaknate District chhunga kalpui a nih dan thlirhona hun hman a ni bawk.
Meeting hi Sorkar laipui in Quarterly (thla thum dan)-a Vigilance Meeting hi nei thin tura a duan angin neih a ni a. Central Scheme hrang hrang khawihtu sorkar Department Official-te leh NGO te an tel a ni.
